2017 - 2018 гъэхэм я щIымахуэ зэманым елъытауэ мы гъэм туристхэм я бжыгъэр про­центи 10-кIэ нэхъыбэ ­хъуащ.

ЗыгъэпсэхуакIуэу нэхъы­бэ зэкIуалIэхэм ящыщщ Iуащ­хьэмахуэ лъапэ. Абы щIышы-лэм и пэщIэдзэ зыгъэпсэхугъуэ махуэхэм лыжэкIэ къэжы­хьы­ным дихьэххэм ящыщу цIыху мин 54-м щIигъу щызэблэкIащ (нэгъабэ елъытауэ процент       11-кIэ нэхъыбэ) икIи абыхэм ящыщу цIыху мин 40-м щIигъум курортым и кIапсэ гъуэгухэр ­къагъэсэбэпащ.
«Туристхэм я бжыгъэм къы­щIыхэхъуам и щхьэусыгъуэ нэхъыщхьэхэм ящыщщ Чегет зыгъэпсэхупIэр къызэрагъэ­щIэ­рэ­щIэжар. А лэжьыгъэм иджыри пащэнущ икIи зэман гъунэгъум къриубыдэу Чегет бгым аргуэру щащIынущ лыжэкIэ къыща­жыхь гъуэгуу тIу», - жиIащ                КъБР-м курортхэмрэ туризмэмкIэ и министр ЩоджэнцIыкIу Мурат. Апхуэдэу абы къыхигъэщхьэхукIащ Азау хуейм егъэлеяуэ куэдыIуэ зэры­щы­зэхуэсыр, абы къыхэкIыу щIыналъэщIэхэр цIыхухэм я зыгъэпсэхупIэ зэрыщIыпхъэр.
Республикэм къыпэщыт къалэн нэхъыщхьэхэм ящыщщ лы­жэкIэ къыщажыхь лъэхъэнэм и мызакъуэу адрей заманхэми ­Iуащхьэмахуэ лъапэ зыщызыгъэпсэхухэр нэхъыбэ щIыныр. Абы папщIэ мыбы щыхашынущ туристхэм зекIуапIэ яхуэхъуну лъагъуэщIэхэр.
Хабзэ хъуауэ, сытым дежи хьэщIэ куэд щызэблокI республикэм и щIыпIэ нэхъ гъэщIэ­гъуэнхэм: Гуэл ЩхъуантIэхэм, Шэджэм псыкъелъэхэм, Ау­шы­джэр псы хущхъуэхэм, Балъкъэр Ипщэм и тхыдэ-архитектурэ комплексым.
Мы гъэм япэу щIымахуэ зэ­маным хьэщIэхэр ирагъэблэ­гъащ: «Уллу-тау» альплагерым, «Уштулу» хьэщIэщым. ЦIыху куэд щыIащ «Джэдыкъуэ», «Янтарнэ» псы хущхъуэхэм.
«Кавказым и пшэплъхэр» - 2019» урысейпсо джип-фестивалым къекIуэлIащ автоспортым дихьэххэм ящыщу цIыху 300-м щIигъу.