КъМР-ни Парламентини Социал политика, урунуу эм саулукъ сакълау комитетини кенгертилген жыйылыуунда республикада нефрология болушлукъ бериу къалай къуралгъанына къаралгъанды.  Бу магъаналы теманы сюзюуге спикерни орунбасары Жанатайланы Салим, КъМР-ни Башчысыны бла Правительствосуну Парламентде эм сюд органлада келечиси Мадина Дышекова, депутатла, Росздравнадзорну бла Роспотребнадзорну КъМР-де бёлюмлерини келечилери, саулукъ сакълау учрежденияланы баш врачлары да къатышхандыла.
Аны ача, Социал политика, урунуу эм саулукъ сакълау  комитетни башчысы Хусейн Кажаров бюгюнлюкде нефрология медицинаны бек къоранчлы бёлюмлеринден бири болгъанын чертгенди. Ол а диализ эмда бюйреклеге операция багъа болгъанлары бла байламлыды. Бу аурууну ол башланнган кезиуде ачыкълагъан магъаналы борчладан бириди. Ол адамны саулугъун, жашауун да сакъларгъа онг береди.
Баш докладны саулукъ сакълау министр Марат Хубиев этгенди. Ол республикада нефрология болушлукъ амбулаториялада эм стационарлада  берилгенин чертгенди. Былтыр а алада 3240 саусуз багъылгъанды, жылны аллындан бери озгъан он айны ичинде уа – 2584 адам. Бюгюнлюкде диагностиканы эм багъыуну шёндюгю амаллары сингдириледиле. Аурууну ол башланнганда ачыкълаугъа энчи магъана бериледи. Болсада, жарсыугъа, арт заманда аны бек оздургъан кезиуле аслам болгъандыла.
Докладчы айтханнга кёре, республикада «Шимал-Кавказ нефрология ара» обществону юч диализ бёлюмю ишлейдиле: Нальчикде, Бахсанда, Нарткъалада. Анда жалгъан бюйрекни 60 аппараты барды. Бир жолгъа 299 саусузгъа болушлукъ этиледи. Дагъыда «Нефролайн-Нальчик» ара да ишлейди, анда уа 20 аппарат барды, болушлукъну 31 саусуз алады. Быйыл августда амбулатория болушлукъну «Диализ Нальчик» арасы ачылгъанды. Анда 35 адамгъа жер барды, толу кючю бла ишлеп башласа диализ амал 280 саусузгъа тамамланыллыкъды. Бюгюнлюкде уа анда 24 адам багъылады.
Министр айтханнга кёре, бу болушлукъ къырал программаны чеклеринде хакъсыз бериледи. Сагъынылгъан аралада кюндюз стационарла да ишлейдиле. Алада уа къыйын саусузла багъыладыла. Бу жумушлагъа ахчаны Борчлу халда медицина страхованияны фонду бёледи: бир адамгъа орта эсеп бла 21 минг сом. Жылны озгъан он айында аралада 42,4 мингден аслам диализ процедура толтурулгъанды, анга 265 миллион сом къоратылгъанды.
Бюгюнлюкде уа бюреклери къыйнагъан 170 саусуз жууукъ кезиуде аллай болушлукъ алып башларыкълары белгиленеди. Бюйреклери башхадан кёчюрюлген 30 адам да барды, ала жашагъан жерлеринде болушлукъ аладыла, дагъыда КъМР-ни баш нефрологу, операцияла бардырылгъан федерал араланы врачлары аланы халларын тинтгенлей турадыла. Саусузла барысы да багъалы дарманла бла жалчытылынадыла.
Быйылны 1 ноябрине бюйреклери ауруп диспансер эсепде 350 сабий турады. Аладан онусунда ол къыйыннга кетип барады (3-5 степень), ючеуленнге уа перитонеал диализ этиледи. 1-чи номерли шахар клиникалы больницада сабий нефрология бёлюмде бу ауруудан къыйналгъан сабийлени ата-аналарына школ къуралып, баланы халын контрольда къалай тутаргъа кереклиси, профилактиканы амаллары юйретиледиле. Келир жыл а гемодиализ аралада перитонеал диализни кабинетлерин ачаргъа белгиленеди. Алада уа къан тамырлары осалдан бу процедураны бардырыргъа онг болмагъанлагъа болушлукъ этилликди.
Докладны сюзе, депутатла сабийлеге берилген аш-азыкъны качествосуну, дарманланы рецептсиз сатыуну, бюйрек аурууланы профилактикасын ангылатыу ишни бардырыуну юслеринден кеслерини оюмларын айтхандыла.
Кенгешде Борчлу халда медицина страхованияны фондуну КъМР-де бёлюмюню башчысы Зурият Бгажнокова, КъМР-ни Саулукъ сакълау министерствосуну штатдан тышында баш нефрологу, 1-чи номерли клиника больницаны нефрология бёлюмюню таматасы Жанна Карданова, «Шимал-Кавказ нефрология араны» директору эмда баш врачы Олег Маслов бла Арсен Кегадуев да сёлешгендиле.
Битеу айтылгъан эсге алынып, жыйылыу жууаплы органлагъа эсгертиулени къабыл кёрюу бла бошалгъанды.