КIуэкIуэ  Казбек  КъБР-м  и  Правительствэм  и  лэжьакIуэхэр  зыхэта  зэIущIэ  ирегъэкIуэкI

КIуэкIуэ Казбек иригъэкIуэкIащ КъБР-м и Правительствэм и лэжьакIуэхэр хэту тхьэмахуэ къэс къызэрагъэпэщ зэIу-щIэр. Абы щытепсэлъыхьащ лъэпкъ проектхэм я щIыналъэ Iыхьэхэр гъэ­зэ­щIэным, къагъэсэбэпа энергием и уасэр зэратыр егъэфIэкIуэным, кIэрыхубжьэ­рыху бы­дэ­хэр зэрызэхуахьэс  щIыкIэр ­зэ­­хъуэ­кIыным, республикэм управле­нэмкIэ и коллегиальнэ органхэм я лэжьэ­кIэр зэтегъэувэным хуэгъэзауэ нэхъ япэ­кIэ яубзыхуауэ щыта пщэрылъхэр зэрагъэзащIэм.

Иджыпсту щыIэ совет зэмылIэужьы­гъуэхэм, ведомствэхэм зэдай комиссэу, лэ­жьакIуэ гупу КъБР-м и Iэтащхьэм, КъБР-м и Правительствэм я деж щыIэхэм, псом япэу жылагъуэ зэгухьэныгъэхэмрэ жылагъуэ зэщIэхъеиныгъэхэмрэ я лIыкIуэхэр зыхэтхэм, зэфIагъэкIхэр къэпщытэным, абы­хэм я зэхэлъыкIэр, ахэр къызэрызэрагъэпэщ щIыкIэр гъэтэмэмыным пыщIа къалэнхэр яубзыхуащ. ЗэрыжаIамкIэ, а псори хуэунэ­тIауэ щытын хуейщ Къэбэрдей-Балъкъэр Республикэм и социально-экономикэ зыу­жь­ы­ныгъэмкIэ стратегиемрэ Урысейм и Президентым накъыгъэ мазэм къыдигъэкIа указхэм къыщыгъэува къалэ­ны­щIэ­хэмрэ гъэзэщIэным.
«Iуэху зэмылIэужьыгъуэхэмкIэ советхэм­рэ  комиссэхэмрэ  щыIэщ. Ауэ абыхэм ящыщ куэдыр тхылъымпIэм ит къудейуэ аращ, адрейхэм мыхьэнэшхуэ зиIэ лэ­жьыгъэ ирагъэкIуэкIыу хужаIэнукъым. Абы къы­хэкIыу убзыхун хуейщ ахэр дяпэкIэ щыIэнрэ щымыIэнрэ. Адрей коллегиальнэ орган псоми я къалэнщ къыщIызэрагъэ­пэща мурадхэм езэгъыу лэжьэну, дэ ­къатщтэ унафэхэр зыхуэдэм, ахэр гъэзэщIа зэрыхъум теухуа жылагъуэ экспертизэм и Iэмэпсымэ нэсу увыну», - къыхигъэщхьэхукIащ КIуэкIуэ Казбек.