КъБР-м и Парламентыр илъэс 25-рэ зэрырикъуам и щIыхькIэ къыдагъэкIа пощт дамыгъэ хэхахэр дыгъэгъазэм и 12-м республикэм и хабзэубзыху орган нэхъыщхьэм щагуэ­шын щIадзащ.

А Iуэхум хэтащ КъБР-м и Парламентым и Уна­фэщIым и къуэдзэ Афэ­щIагъуэ Михаил, КъБР-м и Парламентым и унафэщIу щытахэу Нэхущ Заурбий, Бечелов Ильяс, Туменов Мурадин, Чеченов Ануар, Федченкэ Людмилэ, Бозий Натбий, Жаным Руслан сымэ, Федеральнэ ­пощтым и IуэхущIапIэу Къэбэрдей-Балъкъэрым щы­Iэм и унафэщIым и къалэнхэр зыгъэзащIэ Коваленкэ Юрий, депутатхэр, ЩIалэгъуалэ палатэм хэтхэр.
АфэщIагъуэ Михаил жи­Iащ махуэшхуэр зэрагъэ­лъапIэм КъБР-м и Парламентым и зэхуэсыгъуитхуми хэтахэм я дежкIэ мыхьэнэ зэриIэр.
- Дыгъэгъазэм и 12-р ­УФ-м и Конституцэр цIыху­бэм IэIэткIэ къыщащта махуэщ. Республикэм и депутатхэм я япэ хэхыныгъэхэр щекIуэкIари аращ, - жиIащ АфэщIагъуэм. - Парламентыр сыт щыгъуи хущIэ­къуащ и къалэнхэр ныкъусаныгъэншэу игъэзэ­щIэ­ным. Депутатхэр жыджэру елэжьырт республикэм щыпсэухэм я гъащIэр нэхъыфI хъуным хуэгъэзауэ къащтэ хабзэхэр зэрырагъэфIэкIуэным. КъыжыIапхъэщ, ди зыужьыныгъэм  ахэр сэбэп зэрахуэхъуар. А псор зи фIыщIэр зэгу­ры­Iуэу, зэкъуэту лэжьыгъэм дызэрыбгъэдыхьаращ.
КъБР-м и Парламентыр илъэс 25-рэ зэрырикъуам и щIыхькIэ пощт дамыгъэ ­хэхахэр къыдэгъэкIыныр къы­хилъхьащ «Пощт маркэхэр зэхуэзыхьэсу КъБР-м исхэм я зэгухьэныгъэ» жы­лагъуэ IуэхущIапIэм икIи Федеральнэ пощтым и IуэхущIапIэу Къэбэрдей-­Балъкъэрым щыIэр дэIэ­пыкъуэгъу абыкIэ хъуащ. Карточкэм къощ республикэм и Парламентым и унэр, архитектор Тимонинэ Людмилэ и проекткIэ 1950 гъэ­хэм яухуауэ щытар. Ап­хуэдэуи абы тетхащ ­«Къэбэрдей-Балъкъэр Рес­публикэм и Парламентыр илъэс 25-рэ ирокъу» псалъэхэр.
АфэщIагъуэм жиIащ республикэм и хабзэубзыху орган нэхъыщхьэр илъэс 25-рэ зэрырикъур гъэлъэ­пIэныр къызэзыгъэпэщыну гуп 2018 гъэм и гъатхэпэм яубзыхуауэ зэрыщытар икIи абы унафэ зэрищIамкIэ, махуэшхуэм иращIэ­кIыну Iуэхугъуэхэм 2019 гъэми пащэнущ. Абы къы­зэщIиубыдэнущ егъэджэ­ныгъэ, спорт, щэнхабзэ зэхыхьэхэр, апхуэдэуи Шэ­джэм районым щыIэ бгы­хэм я зым дэкIынущ махуэшхуэм и щIыхькIэ.
КъБР-м и Парламентым РеспубликэмкIэ и Советым и унафэщIу езанэ, етIуанэ зэхуэсыгъуэхэм щыта Нэ­хущ Заурбий псалъэ щратым къыхигъэщащ депу­татхэм дежкIэ япэ илъэсхэр нэхъ гугъуу зэрыщытар, арщхьэкIэ абыи емылъытауэ, я къалэнхэм сыт щыгъуи пэлъэщу ахэр зэрылэжьар.
ЗэIущIэм щыжаIащ я Парламентым и махуэш­хуэм и щIыхькIэ пощт дамыгъэ хэха къыдэзыгъэкIа Урысейм и щIыналъэхэм нэгъуэщI зэрахэмытыр.
МахуэшхуэмкIэ депутатхэм ехъуэхъуащ Коваленкэ Юрий, «Пощт маркэхэр зэхуэзыхьэсу КъБР-м ис­хэм я зэгухьэныгъэ» жылагъуэ IуэхущIапIэм хэт МахуэлI Николай, нэгъуэщIхэри.