Дыгъэгъазэм и 13-м Нарткъалэ къыщызэIуахащ курыт еджапIэщIэ. Абы теухуа гуфIэгъуэ зэхыхьэм кърихьэлIащ КъБР-м и Правительствэм и УнафэщI Мусуков Алий, КъБР-м цIыхухэр егъэджэнымкIэ, щIэныгъэмрэ, щIалэгъуалэм я IуэхухэмкIэ и министр Къумыкъу Iэуес, КъБР-м ухуэныгъэмрэ гъуэгу хозяйствэмкIэ и министр Къуныжь Вячеслав, Аруан щIыналъэм и администрацэм и унафэщI Куэшей Азэмэт, районым щIыпIэ самоуправленэмкIэ и органхэм я лIыкIуэхэр, жылагъуэ лэжьакIуэхэр, адэ-анэхэр, нэгъуэщIхэри.
ЦIыхур щыпэкIу IуэхущIапIэм и щIыхьэпIэм и бгъуитIымкIэ еувэкIа еджакIуэ цIыкIухэм я нэгум къищ гуфIэм зэхыуигъащIэрт мы махуэм ахэр куэд щIауэ зэрыпэплъэр.
ЗэIущIэр къызэIуихыну япэу псалъэ зрата Мусуков Алий жиIащ нобэрей махуэр дэтхэнэ зым дежкIи зэрылъапIэр, сыту жыпIэмэ зыхуэныкъуэ щымыIэу сабий миным нэс зыщеджэну еджапIэм и бжэр зэIуахри.
- Псом япэ фIыщIэ яхуэсщIыну сыхуейт еджапIэр зэфIэувэным зи къару тезыгъэкIуэдахэмрэ зи гуащIэ хэлъхэмрэ - пIалъэ ягъэувар къэмысами, къызыхуэтыншэу куэд щIауэ дызыщIэхъуэпс еджапIэр зыхуей зэрыхуагъэзам щхьэкIэ. Сыщогугъ мыбы цIыху щэджащэхэр къызыхэкIын ныбжьыщIэхэр щрагъэджэну, гъэсэныгъэ щыхалъхьэну. Курыт еджапIэм щылэжьэнухэми щеджэнухэми сынывохъуэхъу ехъулIэныгъэщIэхэр фиIэну.
Нобэ зи бжэр зэIуах еджапIэщIэм щылэжьэнухэми абы щIэныгъэ щызэзыгъэгъуэтынухэми насып, гуфIэгъуэ къахудэкIуэну, ехъуэхъуащ къыкIэлъыкIуэу къэпсэлъа Куэшей Азэмэт. Лицейр зыухуахэм фIыщIэ яхуищIри, и пIалъэр къэмысу ухуэныгъэр зэраухам папщIэ Аруан щIыналъэ администрацэм къыбгъэдэкI щIыхь тхылъхэмкIэ игъэлъэпIащ КъБР-м «Капитальнэ ухуэныгъэмкIэ управленэ» къэрал кIэзонэ IуэхущIапIэм и унафэщI Тэрчыкъуэ Андзор, «А-Сервис» ООО-м и техническэ унафэщI Багъ Мадинэ, ухуэныгъэмкIэ унафэщI Макитов Муслим, а IуэхущIапIэм и лэжьыгъэхэр езыгъэкIуэкI Ахъуэбэч Рэмэзан сымэ.
Илъэсищ хъуауэ зыпэплъэу иджы ята еджапIэм зэрыщыгуфIыкIыр, лэжьыгъэкIи, егъэджэныгъэкIи тыншыпIэ ящыхъуну гугъэфIхэр зэраIэр жиIащ лицейм и унафэщI Иуан Розэ.
Хъуэхъу псалъэхэр зэфIэкIа нэужь хьэщIэхэм еджапIэм зыщрагъэплъыхьащ, ар Iэмэпсымэрэ унэлъащIэкIэ къызэрызэгъэпэщар ирагъэлъэгъуащ. Метр зэбгъузэнатIэ минибгъурэ щитIрэ зи инагъ IуэхущIапэр корпуситху мэхъу. Класс нэхъыщIэхэмрэ нэхъыжьхэмрэ щеджэну Iыхьэхэр зэщхьэщыхащ, предмет къэс хухэха пэшхэри, шхапIэри, спортзалри Iэхуитлъэхуитхэщ, зыхуеину IэмэпсымэхэмкIэ узэдащ, зыгъэпсэхугъуэ зэманыр щагъэкIуэну кIэлындорхэм тIысыпIэхэри иIэу апхуэдэщ.
Хуит ящIмэ, школ унафэщIым зэрыжиIамкIэ, мыбы ныбжьыщIэхэр щрагъэджэнущ дыгъэгъазэм и 17-м къыщыщIэдзауэ.