Тюнене Правительствону юйюню Колонналы залында «Ана махтаулукъну» майдалларын бериуге аталгъан къууанчлы жыйылыу бардырылгъанды. Ол сыйлы къырал саугъагъа Къабарты-Малкъарда жашагъан  кёп сабийли аналадан жыйырмасы тийишли болгъанды.
Жыйылгъанлагъа айланып, КъМР-ни Башчысыны къуллугъун болжаллы халда толтургъан Казбек Коков тиширыуланы жууукълашып келген байрам бла – Ананы кюню бла – къызыу алгъышлагъанды. «Сабийлеригиз тюз ниетли, адепли, къыралыбызны намыслы инсанлары болуп ёсер ючюн сиз къолугъуздан келгенни аямайсыз, алагъа жюрек жылыуугъузну къызгъанмай бересиз, чыгъармачылыкъгъа талпындырасыз, хунерликлерин ачаргъа болушасыз, жетишимлерине ала бла бирге къууанасыз.Ма ол жигерлилигиз ючюн, юйюрню даражасын кётюрюуге, аны адет-тёрелерин сакълаугъа уллу къыйын салгъаныгъыз ючюн жюрегими теренинден ыспас этерге  сюеме сизге»,-дегенди регионну оноучусу.
Сабийлеге, дегенди Коков, аланы фахмуларын толусунлай ачыкълаугъа къайгъырыу – адамны, юйюрню, саулай жамауатны да алгъа талпындыргъан баш кючледен бириди. Аны себепли юйюрге, аналагъа, сабийлеге тутхучлулукъ этиу республиканы власть органларыны бек магъаналы ишлери болгъанлай къалады.
Къабарты-Малкъар, деп белгилегенди КъМР-ни Башчысыны къуллугъун толтургъан, 12 битеуроссей миллет проектни регион кесеклерин жарашдырыугъа тири киришгенди. Аладан бек магъаналылары шёндюгю заман излеген тынгылы билим алыргъа, медицина жумушларын жалчытыргъа кимни да къолундан келирча этиуге, адамланы жашау болумларын игилендириуге, сабийлери болгъан юйюрлени къолайлыкъларын ёсдюрюуге бурулупдула.
-Юйюр, артыкъда кёп сабийлиси, анга къайгъырыу болгъанын сезип турурча этер ючюн къолубуздан келгенни аярыкъ тюйюлбюз,-дегенди Коков.
Ахырында ол кёп сабийли аналаны сыйлы саугъалары бла алгъышлагъанды, кийик саулукълу, насыплы  болурларын сюйгенин билдиргенди, жюрек ырахатлыкъ тежегенди.
Къууанчлы жыйылыугъа федерал араны келечиси, КъМР-ни Парламентини бла Правительствосуну башчылары, профсоюз эмда жамауат биригиулени таматалары къатышхандыла.