КъБР-м и Iэтащхьэм и ­къалэнхэр пIалъэкIэ зыгъэзащIэ КIуэкIуэ К. В. Правительствэм и Унэм иджыблагъэ щригъэ­кIуэкIащ Къэбэрдей-­Балъкъэр Республикэм Нар­котикхэм япэ­щIэ­ты­нымкIэ щыIэ комиссэм и зэIущIэ.

Абы хэтащ КъБР-м къе­гъэщIылIа федераль­нэ инспектор нэхъыщхьэ Канунников В. А., КъБР-м и Парламентым и УнафэщI Егоровэ Т. Б., КъБР-м и Правительствэм и Уна­фэщI Мусуков А. ТI., министерствэхэм, ведомст­вэхэм, хабзэхъумэ IэнатIэхэм я унафэщIхэр, ­къа­лэ, район ад­минист­рацэхэм я Iэтащхьэхэр, жылагъуэ зэгухьэныгъэ­хэм я лIыкIуэхэр.
Къызэхуэсахэр тепсэ­лъыхьащ Наркотикхэм япэ­щIэтынымкIэ муниципальнэ комиссэхэм щIалэгъуалэр наркотикхэм емыгъэтхьэкъуным хуэгъэзауэ ирагъэкIуэкI лэжьыгъэм, наркотикхэр хабзэм къе­мызэгъыу зэрызэблагъэкIым зэрыпэщIэтым, «Iущ­хьэ-2018» оперативнэ лэжьыгъэр зэрырагъэ­кIуэ­кIам кърикIуахэр. Гулъытэ хэха хуащIащ наркотик-хэм итхьэкъуахэр зэрагъэхъуж, гъащIэм зэрыхагъэзэгъэж щIыкIэр егъэ­фIэкIуэным, псом хуэ­мыдэу а лэжьыгъэр уго­ловнэ-гъэзэщIакIуэ сис­темэм хиубыдэ IуэхущIапIэхэм щаIыгъхэм зэ­рыдрагъэкIуэкIым.
- Наркотикхэм япэ­щIэ­ты­нымкIэ муниципальнэ комиссэхэм я лэжьыгъэм ныкъусаныгъэ пыухыкIахэр хэлъщ, - жиIащ КIуэ­кIуэ Казбек. - Псом япэу къэгъэлъэгъуапхъэщ профилактикэ лэжьыгъэхэм я къызэгъэпэщыкIэм арэзы укъызэримыщIыр. Наркотикхэм япэщIэтынымкIэ программэхэр гурыIуэ­гъуэу убзыхуауэ щагъэ­хьэзырар Прохладнэ къалэм, Прохладнэ, Аруан, Лэскэн районхэм я за­къуэщ. Май, Шэджэм, ­Бахъсэн районхэм, Бахъ­сэн къалэм я медици­нэ IуэхущIапIэхэм психиатрхэр-наркологхэр яIэкъым. Апхуэдэу республикэм и районхэм нэгъэсауэ щегугъуркъым губгъуэхэм къы­щыкI щIэпыр пыуп­щIы­ным.
«Наркотикхэм ятхьэкъу­хэр мащIэ тхуэщIынущ, абы хуэгъэзауэ диIэ хэ­кIыпIэхэмрэ Iэмалхэмрэ тэмэму къэдгъэсэбэпмэ. Наркотикхэм япэ­щIэты­ным­кIэ программэхэр ­щагъэзащIэкIэ ведомствэхэр зэпыгъэщхьэху­кIауэ лажьэ хъунукъым. Абы и лъэныкъуэкIэ дэ­Iэпыкъуэгъу нэхъыщхьэу щытыпхъэр наркотикхэм япэщIэтынымкIэ муниципальнэ комиссэхэрщ», - къыхигъэщхьэхукIащ КIуэ­кIуэ Казбек.
Зытепсэлъыхь Iуэхум ­хиубыдэу зэфIагъэкIхэр зэIущIэм щыжаIащ Iуащ­хьэмахуэ районым и щIыналъэ администрацэм и Iэтащхьэ Залиханов К. Хь-У., Бахъсэн ­районым и щIыналъэ администра­-цэм и Iэтащхьэ Балъ­къыз А. Хь., Прохладнэ къалэм и администрацэм и Iэтащхьэ Тараев И. В., КъБР-м  узыншагъэр хъумэнымкIэ и ми­нистр Хъубий М. Б., Тезырхэр егъэпшыны­ным­кIэ федеральнэ къу­лыкъу­щIапIэм и Управленэу ­КъБР-м щыIэм и уна­фэ­щIым и къалэнхэр зыгъэзащIэ Бырмамыт Ч. Хь. сымэ.