КъБР-м законхэр къыдэзыгъэкI и орган нэхъыщхьэм и президиумым и зи ­чэзу зэIущIэр иригъэкIуэкIащ респуб­ликэм и Парламентым и УнафэщI Егоровэ Татьянэ. Абы Iуэху зэмылIэужьы­гъуэу блыщIым щIигъум щыхэплъащ.

Ауэ нэхъыщхьэ дыдэу щытар законодательствэм щыгъэува пIалъэм къриубыдэу КъБР-м и Парламентым къыщыхалъхьа документырщ - «2019 гъэм, 2020, 2021 гъэ­хэм я лъэхъэнэм Къэбэрдей-Балъкъэр Республикэм и бюджетым и IуэхукIэ» ­КъБР-м и законым и проектырщ.
БюджетымкIэ, налогхэмкIэ, финансхэмкIэ комитетым и унафэщIым и къуэдзэ Мэремыкъуэ Сэфарбий зэрыжиIамкIэ, республикэ бюджетым и проектым лъабжьэ хуэхъуащ стратегиер нэхъыщхьэхэмрэ 2019 - 2021 гъэхэм Къэбэрдей-Балъкъэр Республикэм и социально-экономикэ зыу­жьыныгъэм зэрыхуэплъэм и вариант нэхъыщхьэмрэ.
Ягъэува графикым тету финанс документ нэхъыщхьэм и унэтIыныгъэ пыухыкIахэм министерствэхэмрэ ведомствэхэмрэ  я лIыкIуэхэр кърихьэлIэу щыхэплъэнущ ­КъБР-м и Парламентым и комитетхэм я зэIущIэхэм. Апхуэдэу мы лэжьыгъэм Iэмал зэриIэкIэ нэхъ зыубгъуауэ цIыхубэмрэ хъыбарегъащIэ IуэхущIапIэхэмрэ къыхашэн папщIэ республикэ бюджетым и проектым щытепсэлъыхьыну зэIущIэшхуэхэр къызэрагъэпэщынущ. Законопроектыр япэ къеджэгъуэу КъБР-м и Парламентым и зэIущIэу къыщащтэну я мурадщ дызэ­-рыт мазэм. ЯпэщIыкIэ депутатхэм бюд­жетым и бжыгъэ нэхъыщхьэхэр зэпкърахынурэ къащтэнущ, адэкIэ документыр етIуанэ къеджэгъуэм щыхуагъэхьэзыркIэ хэщIхэмкIэ статьяхэр ягъэбелджылынущ.
Парламентым и президиумым и зэIущIэм апхуэдэу щытепсэлъыхьащ «2019 гъэм, 2020, 2021 гъэхэм я лъэхъэнэм Къэ­бэрдей-Балъкъэр Республикэм ФIэкIыпIэ зимыIэ медицинэ страхованэмкIэ и бюд­жетым и IуэхукIэ», «Республикэм и закон щхьэхуэхэм зэхъуэкIыныгъэхэр хэлъ­хьэ­ным и IуэхукIэ» КъБР-м и законхэм я проектхэр.
А документхэр законхэр къыдэгъэ­кIы­нымкIэ жэрдэм къаIэтыну хуитыныгъэ зыбгъэдэлъ субъектхэм хуагъэхьащ хуащI дагъуэхэмрэ хэлъхьэпхъэу къалъытэхэмрэ яубзыхун папщIэ. Апхуэдэу а документхэр КъБР-м Къэзыпщытэ-къэзыбж и палатэми иратащ заключенэ игъэхьэзырын папщIэ.
Президиумым и зэIущIэм депутатхэр щы­тепсэлъыхьащ федеральнэ закон щхьэ­хуэхэм я проектхэм, апхуэдэу УФ-м и нэгъуэщI субъектхэм я парламентархэм законхэр къыдэгъэкIынымкIэ къаIэта жэрдэмхэмрэ абыхэм къыхалъхьа Iуэху пыу­хыкIахэмрэ.
Депутатхэм унафэ къащтащ «Урысей зэкъуэт» урысейпсо политикэ партым и Ар­уан щIыналъэ къудамэм и пэщIэдзэ организацэ №6-м и секретарь Дзэгъащтэ ­Суфян КъБР-м и Парламентым и ЩIыхь тхылъыр етыным теухуауэ.
«Комитетым хухаха зэманым» хиубыдэу зэIущIэм щытепсэлъыхьащ КъБР-м уголовнэ тезырыр зэрыщрагъэпшыным пы­щIа лэжьыгъэхэр егъэфIэкIуэным.