Турист инфраструктураны юсюнден айтханда уа, районда 11 къонакъ юй бла пансионат ишлейдиле, халкъны аш-суу бла жалчытхан 22 предприятие барды. Былтыр а бери 120 мингнге жууукъ адам келгенди. Быйылны тогъуз айыны шартларына кёре уа, аланы саны 100 мингден аслам болгъанды.
«РФ-де ич туризмни айнытыуну юсюнден» федерал программаны чеклеринде 2014 жылдан бери къырал-энчи партнёрлукъ мадар бла «Зарагиж» автотурист кластер ишленеди. Дагъыда «Черек» деген турист-рекреация кластерни  проекти да жарашдырылады.
- Бюгюнлюкде инвесторланы болушлукълары бла бир ненча проект тамамлайбыз. Ол санда Чирик кёлде кёрмючле бардыргъан ара, физкультура-саулукъ сакълау комплекс, къонакъ юй-ресторан ишленедиле. Огъары кёлледе да саулукъ сакълау комплекс къуралады,-деп билдиргенди докладчы.
Аны бла бирге уа кемчиликле да бардыла. Аланы арасында Глашланы Артур жолланы осаллыкъларын, тийишли инфраструктура житишмегенин  белгилегенди. Дагъыда къонакъланы кёбюсю  районну онгларыны, анда болгъан сейир жерлени юслеринден билмейдиле.
КъМР-ни экономиканы айнытыу министрини орунбасары гитче эм орталыкъ бизнесни айнытыу эм конкуренция жаны бла департаментни башчысы Ольга Белецкая республикада туризм эм рекреация сферада инвестицияланы кёбейтиуге баш магъана берилгени чертгенди. Бу ишде уа къырал-энчи партнёрлукъ мадарны айнытыугъа энчи эс бурулады.
КъМР-де «Экономиканы айнытыу эм инновация экономика» деген къырал программаны чеклеринде «Гитче эм орталыкъ бизнесге болушлукъ этиу эм айнытыу», «Файдалы инвестиция амалланы къурау»   деген подпрограммала да толтуруладыла. Алада бизнес бла кюрешгенлеге ахча, ырысхы эм ангылатыу болушлукъ этиуню низамы белгиленипди. Дагъыда  КъМР-ни Правительствосу республикада бизнесге тийишли онгла берир мурат бла  «Гитче эм орталыкъ предпринимательствону айнытыу жаны бла федерал корпорация» бла келишимге къол салгъанды.
- Жылны аллындан бери гитче эм орталыкъ бизнесни предприятияларына 35 микрозайм берилгенди, битеу да бирге  25,2 миллион сом. Ырысхы бла болушур мурат бла уа бизнес-инкубаторла ишленнгендиле, алада аренда тёлегенде льготала тохташдырылгъандыла, кёрмючле, сёлешиуле  бардырырча, семинарла къурарча жерле да къуралгъандыла,-дегенди Белецкая.
Аны айтханына кёре, «2025 жылгъа дери Шимал-Кавказ федерал округну айнытыу» къырал программагъа   республика келир жылгъа беш проектни кёргюзтгенди.  
Курорт эм туризм министрни орунбасары Сумайланы Ахмат  инвесторланы кёбейтиу жаны бла къаллай иш этилгенини юсюнден айтханды. «Адамла солурча, ол анда сабийле, жерле къураргъа боллукъ эди. Бизге туристле кёп келирлерин сюе эсек, башха регионланы сынаулары кёргюзтгенича, къонакъ юйле ишлетирге керекди. Тамамланнган жумушланы качествосу бла бирге уа тёгерек-баш таза болургъа, адамла бла ариу сёлеше билирге тийишлиди»,-дегенди ол.
Жыйылыуда КъМР-ни айнытыуну корпорациясыны директоруну къуллугъун толтургъан Чочайланы Ахмат, Аушигер эм Бабугент эллени башчылары Аслан Урусов бла Османланы Мухтар, «Бызынгы» солуу базаны бла «Мастер класс А» обществону таматалары  Аналаны Алий эм Жабраил Афаунов, энчи предприниматель Геляланы Чомай да сёлешгендиле.
Ала районда туризмни айнытыуда тюбеген чырмауланы, аланы кетериуню юслеринден   оюмларын айтхандыла. Сёз  ишчи жерлени къурауну, тамамланнган жумушланы качествосун игилендириуню, туризм эм сервис жаны бла кадрланы хазырлауну юслеринден баргъанды.
Кенгешде айтылгъанны эсге алып, жууаплы органлагъа эсгертиуле къабыл кёрюлгендиле.