Тюнене Нальчикде Къырал концерт залда ВЛКСМ къуралгъанлы 100 жыл толгъанына аталып, къууанчлы жыйылыу бардырылгъанды.
Анга КъМР-ни Башчысыны Администрациясыны таматасы Мухамед Кодзоков, Парламентни спикери Татьяна Егорова, Правительствону башчысы Мусукланы Алий, Адамны эркинликлери жаны бла уполномоченный Зумакъулланы Борис, министрле, депутатла, комсомол къымылдауну ветеранлары, жаш тёлю да къатышхандыла.
Аны ача, КъМР-де ВЛКСМ-ни ветеранларыны советини башчысы Александр Жигатов залда жыйылгъан тёлюлени комсомол къымылдаугъа сюймеклик бирикдиргенин чертгенди. Ол ВЛКСМ совет къыралда бек уллу, башха жаш тёлю жамауат организациягъа ахырда ушамагъан къымылдау болгъанын айтханды. Аны келечилери къыралны Уллу Ата журт урушда душманладан къоруулаугъа, къазауатдан сора уа халкъ мюлкню аягъы юсюне этиуге тири къатышхандыла. «Илмуда, культурада жетишимле, аламны кючлеу окъуна комсомолчула бла байламлыдыла. Бюгюнлюкде да биз сынауубузну, билимибизни ёсюп келген тёлюню юйретиуде хайырланыргъа хазырбыз»,-дегенди ол.
Ызы бла залгъа ВЛКСМ-ни Къабарты-Малкъар обкомуну байрагъын кийиргендиле. Анга уа жыйылгъанла ёрге туруп, къарсла уруп тюбегендиле.
 Мухамед Кодзоков, 1988-1992 жыллада уа ол комсомолну обкомуну биринчи секретары болгъанды, КъМР-ни Башчысыны къууллугъун болжаллы халда толтургъан Казбек Коковну алгъыш сёзюн окъугъанды. Анда бу жаш тёлю организацияны келечилери артыкъда къыйын, жууаплы ишлени сайлап, аланы бет жарыкълы толтургъанлары айтылады.
  ВЛКСМ-ни КъМР-де обкомуну биринчи секретары Зумакъулланы Борис  бу сейирлик организацияны келечиси болгъанына ёхтемленнгенин айтханында, жыйылгъанла анга къарсла бла тюбегендиле. «Биз сюйсек жерни окъуна тепдираллыкъбыз деп, асыры уллу борчла да ала болур эдик кесибизге. Алай антыбызгъа не заманда да кертичи болгъанбыз. Бек алгъа туугъан журтубузну юсюнден сагъыш этгенбиз, андан сора къайгъыргъанбыз кесибизге»,-дегенди ол.
Борис Мустафаевич республиканы комсомол къымылдаууну, аны келечилерини юслеринден энчи юлгюле келтирип да айтханды. Бюгюнлюкде къырал даражада Совет Союзну жетишимлерине, коммунистлени, комсомолчуланы къыралыбызны айнытыуда юлюшлерине тийишли багъа берилгенине къууаннганын билдиргенди.   
 Ол республикада  жаш тёлю организацияны жюзжыллыгъын белгилеу жаны бла комитет къуралгъанын эсгертип, Казбек Коковха, комитетни башчысы Мусукланы Алийге, Татьяна Егоровагъа, Мухамед Кодзоковха ыразылыгъын айтханды. Байрамгъа хазырланыуну чеклеринде уа «КъМР-де комсомолну тарыхы» деген китап басмаланнганды. «Анда комсомолчуланы жашауларыны, этген жигитликлерини юслеринден сейир шартла бардыла»,-деп къошханды ол.
Татьяна Егорова да кёп жылланы ВЛКСМ-ни тизгинлеринде ишлегенди. Ол жыйылгъанланы кесини эм Парламентни депутатларыны атларындан алгъышлай, комсомолчула сынауладан, къыйынлыкъладан артха турмагъанларын, къыралны керти патриотлары болгъанларын чертгенди. «ВЛКСМ кадр резерв эди. Аны келечилери жашауну къыйын жолун ётюп, уллу сынау жыйышдыргъандыла»,-дегенди эмда аны шёндюгю жашаугъа сингдирирге боллугъун белгилегенди.
Тюбешиуде уа башхала да сёлешгендиле. Жыйылгъанлагъа ариу байрам концерт да кёргюзтюлгенди.