Быйыл Россейни Социал фондуну регионда бёлюмю сабий туугъан 756 юйюрге бир кереге тёлениучю пособие бергенди, аны ючюн 17 миллион сом бёлюннгенди. Ол ахчаны ишлемеген ата-ана, опекун алыргъа эркиндиле, алай ала очный халда бийик, орта эм къошакъ профессионал билим берген учрежденияда окъургъа боллукъдула. Уруннганла пособияны ишлеген жерлеринде аладыла. 1 февральдан башлап аны ёлчеми 22 909 сомду.

Пособияны алыр ючюн фондну клиент службасына неда МФЦ-гъа заявление жазаргъа керекди. Битеу шагъатлыкъ этген данныйле фондха жетгенлей ахча тёленирикди. Аланы талайы жетмей эсе, быллай документле изленирикдиле:

     - сабий туугъаныны юсюнден шагъатлыкъ къагъыт;

     - ишлеген жерден ата-ана пособияны эндиге дери алмагъанларыны юсюнден справка;

    - ата бла ана айырылып эселе, аны юсюнден шагъатлыкъ къагъыт;

    - заявитель окъуй эсе, ол очный халда билим алгъаныны юсюнден справка;

    - пособияны алыргъа анадан башха инсан келген эсе, ананы сабийге къараргъа эркинлиги сыйырылгъаныны неда ол ёлгенини юсюнден справка;

     - ахчаны баланы алып ёсдюрюрге сюйген адам алыргъа излей эсе, сюдню анга баланы алыргъа эркинлик этген оноууну копиясы;

   - сабий Россейде туумагъан эсе, ол туугъаныны юсюнден тыш къыралны шагъатлыкъ къагъытын Социал фондха келтирирге керекди.

     Заявленияны бала туугъанындан сора алты айдан кеч къалмай жазаргъа тийишлиди, анга битеу керекли документле да келгенлеринден сора он кюнню ичинде къараллыкъды. Энчи кезиуледе ол болжал 20 ишчи кюннге дери созулургъа боллукъду. Ахчаны берирге оноу къабыл кёрюлсе, ол 5 ишчи кюнню ичинде счётха келликди.

Кульчаланы Зульфия.