Бу кюнледе республиканы жер-жерлеринде Малкъар халкъны жангырыууну кюнюне жораланып кёп тюрлю къууанчла, тюбешиуле, жыйылыула ётедиле. КъМР-ни Маданият фондунда да аллай ингир ётгенди. Аны белгили жырчыбыз, РФ-ни сыйлы артисткасы Таукенланы Малкъарбийни къызы Галина фондда ишлегенле бла бирге къурагъанды. Къууанчха Къабарты-Малкъарда жашагъан миллетлени биригиулерини, жамауат организацияланы келечилери, школчула, жырчы окъутхан эмда юйретген жаш адамла да къатышхандыла.
Жыйылыу миллетибизни къыйын кезиуюн эсгериуден башланнганды. Таукенланы Галина, урунууну ветераны, жамауатчы Жаболаны Жабрайыл, китап басманы иелеринден бири Котлярова Мария, Малкъар халкъны зор бла кёчюргенде азап чекгенлени мемориалыны директору Теммоланы Фаризат, КъМР-ни Журналистлерини союзуну правленини таматасыны къуллугъун толтургъан Шауаланы Разият да къууанчны, бушууну да сагъына, бу ингирге келгенлени алларында сёлешгендиле.
–Атабыз урушда, анабызны уа туугъан жерине термилгенин, «Кавказда терекледе къалачла битедиле»,- деучюсюн къалай унутурма,- дегенди Галина Малкъарбиевна.
Жаболаны Жабрайыл бла Теммоланы Фаризат да, эсгериулеринден сора, малкъар халкъ бюгюнлюкде Россейде жашагъан миллетлени биринден артха къалмай баргъанын, кёп жаны бла уа кёплени озгъанын айырып айтхандыла. Маданиятда, спортда, экономикада, башха бёлюмледе да атларын айтдыргъан алимлерибиз, устазларыбыз, журналистлерибиз, жазыучуларыбыз болгъанларын чертгендиле.
Мария Котлярова да таулула артха къайтып келгенден сора, терк тирилгенлерин, бютюнда кючлю болуп уруннганларын чертгенди. «Халкъыгъызда кёпле жигерликлери, кишиликлери, ётгюрлюклери бла да махтау тапхандыла, къыралны бек сыйлы атларына бла орденлерине тийишли болгъандыла»,- деп, ол Таукенланы Галинагъа малкъар миллетни юсюнден китапны саугъалагъанды.
Ол кюн бу ингирге келгенле жаш жырчыла Юсюпланы Земфирагъа, Асеев Кантемирге, Темуккуланы Аминагъа, Атталаны Лейлягъа, Атабийланы Алибекге, Лаптева Ингагъа, Хамгокова Илонагъа, Сижажев Астемирге сюйюп тынгылагъандыла. «Голлу», «Малкъар таула» , «Минги-Тау» деген жырларыбызны эшитген а бютюн хычыуун эди.
Габоланы Разият.
