КъМР-ни Башчысыны къуллугъун болжаллы халда толтургъан Казбек Коков Нальчикде от ёчюлтюучюлени 19-чу номерли частыны биринчи отрядында къуллукъ этген Салам Карданов, республиканы ара шахарында жашагъан Ахкёбекланы Беслан, Ашамаз Крымшокалов, Аслан Токмаков эмда Анатолий Луценко бла тюбешип, алагъа Нальчикде Гагарин орамда юйледен биринде от алгъан фатардан кёп сабийли юйюрню къутхаргъанлары, ол заманда этген жигитликлери эмда кишиликлери ючюн ыспас этгенди.
Тюбешиуге РФ-ни МЧС-ини Къабарты-Малкъарда Баш управлениясыны таматасы Михаил Надежин да къатышханды.
Къаугъалы иш былтыр 31 декабрьде болгъанды. От ёчюлтюучюле жетерни аллында Ахкёбекланы Беслан, Ашамаз Крымшокалов, Аслан Токмаков эмда Анатолий Луценко, бирча къазауат этип, от алгъан фатардан тиширыуну бла къызчыкъны чыгъаргъандыла. Терезени темир чалдишин бузуп, дагъыда эки сабий къалгъан отоугъа жол ачып, алай бла от ёчюлтюучюлеге уллу болушлукъ этгендиле.
От тюшген жерге дежурный къалауурну къауумунда биринчи болуп жетген Салам Карданов, жашаууна къоркъуу тюшгенине да къарамай, терезе бла кирип, эки жашчыкъны бирем-бирем чыгъаргъанды. Сабийле,аналары бла терк окъуна больницагъа жетдирилгендиле. Врачла айтханнга кёре, аланы саулукъларына, жашауларына да къоркъуу жокъду. Юйюрге хар не жаны бла да болушлукъ этилгенди.
Къутхарыу операциягъа къатышханлагъа эсде къаллыкъ саугъаланы бере, Казбек Коков былай белгилегенди: «Хар биригиз да уллу ыспасха тийишлисиз, сау болугъуз. Бек башы - ёлген,ачыгъан болмагъаныды. Сиз уллу адамлыкъ этгенсиз, жаныгъызгъа къоркъмай, кесигизни аямай, башхаланы ёлюмден къутхаргъансыз, аны бла инсанлыкъ эмда профессионал борчну толтурууну юлгюсюн кёргюзтгенсиз».
