КъБР-м и Iэтащхьэ КIуэкIуэ Казбек хэтащ ­КИФЩI-м коронавирус узы­фэ зэрыцIалэм зыщемыгъэубгъуным пыщIа Iуэхухэм, абыхэм а узым щызыхъумэ мастэр цIыху­­хэм яхэлъхьэнри хэту, хуэунэтIауэ Урысей Федерацэм и Президентым и полномочнэ лIы­кIуэу Кавказ Ищхъэрэ федеральнэ щIыналъэм щыIэ Чайкэ Юрий иригъэкIуэкIа зэIущIэм.
ЗэIущIэр къыщызэIуихым Чайкэ Юрий къыхигъэщащ округым эпидемио­логие щытыкIэр иджыри гугъуу къызэрыщынэжыр.
- Дызэрыт тхьэмахуэ зэ­хуакум и пэщIэдзэм ирихьэлIэу щIыналъэм коронавирус узыфэ лIэужьы­гъуэщIэр зэуэлIахэм я бжыгъэр мини 142-м нэблагъэу щатхауэ щытащ. Ар щIы­пIэм щыпсэухэм я процент 1,5-рэ мэхъу. Узыфэр къы­зэрежьэрэ округым хыхьэ щIыналъэхэм щыщу цIыху 2.849-рэ дунейм ехыжащ. Зи унэхэм къыщIэкI мыхъу сымаджэхэм я деж кIуэурэ дохутырхэр якIэлъоплъ, я псэупIэм къыщIэкIыну Iэмал зимыIэхэм я процент 74-рэ мэхъу апхуэдэхэр. ЩIыналъэм хыхьэ субъектхэм нобэм ирихьэлIэу къы­щызэрагъэпэщащ цIыху­хэм мастэ щыхалъхьэ щIыпIэу 141-рэ. Яужь итщ вакцинэр щыхаIун папщIэ пIалъэкIэ лэжьэну апхуэдэ щIыпIэхэр къызэгъэпэ­щыным», - жиIащ полномочнэ лIыкIуэм.
«Мыхьэнэшхуэ иIэщ цIыху­хэм мастэхэр яхэлъ­хьэным тэмэму зыхуэгъэ­хьэзырауэ, Iуэхур щызэблэу къэмыхъуу егъэкIуэ­кIы­ным», - къыхигъэщхьэхукIащ Чайкэ Юрий.
Коронавирус узыфэ лIэу­жьыгъуэщIэм пэщIэтыф мастэхэр балигъхэм яхэлъ­хьэным хуэгъэза лэжьыгъэр зэрекIуэкIым теухуауэ къэпсэлъахэщ властым и федеральнэ органхэм я лIыкIуэхэр, округым хыхьэ щIыналъэхэм я уна­фэщI­хэр.
Чайкэ Юрий гулъытэ хэха хуищIу жиIащ къэралым и УнафэщIым и полномочнэ лIыкIуэм и аппаратым ­Урысей Федерацэм и Президентым пщэрылъ къащищIахэр гъэзэщIэн пап­щIэ зыхуэныкъуэ дэIэпы­къуныгъэ щIыналъэхэм яритыну зэрыхьэзырыр. Пщэрылъхэр округым хыхьэ субъектхэм зэрыщагъэзащIэр кIэлъыплъыныгъэ ткIийм щIагъэувэнущ.
КИФЩI-м щыIэ эпиде­миологие щытыкIэм теухуа зэIущIэм КIуэкIуэ Казбек щыжиIащ: «Къэбэрдей-­Балъкъэрым эпидемиологие щытыкIэр зэпIэзэрыт щыщIыжыным хуэгъэза лэжьыгъэр иджыри йокIуэкI. Республикэм коронавирусым пэщIэтыф мас­тэр цIыху 2842-м щыхалъ­хьащ, иджыри вакцинэ къытIэрыхьэну дыпоплъэ».
Мы зэманым вакцинэр щыхаIу щIыпIэ 32-рэ мэ­лажьэ, апхуэдэхэр къалэ округ, муниципальнэ зэгухьэныгъэ псоми яIэщ, гуп щхьэхуэхэм кIуэурэ абы щылажьэхэм мастэр яхэлъ­хьэным теухуа лэжьыгъи ирагъэкIуэкI. Коронавирус къеуэлIауэ шэч зы­хуащIхэм щакIэлъыплъын, апхуэдэхэм я узыншагъэр къапщытэн папщIэ щIыналъэм къыщызэрагъэпэщауэ щолажьэ амбулаторэ центру хы. Сымаджэхэр нэхъ мащIэ хъууэ зэры­хуежьам ипкъ иткIэ Къалэ клиникэ сымаджэщ №2-мрэ Республикэ клиникэ сабий сымаджэщымрэ щы­лажьэ госпиталитIым узыр зэуэлIахэр ирашэлIэ­жыркъым. Адрей госпиталиблым щыпащэ коронавирус узыфэ лIэужьы­гъуэщIэр зэуэлIахэм ядэ­Iэпыкъун лэжьыгъэм.