Быйыл биринчи кварталда Къабарты-Малкъарда ишлеген гидроэлектростанцияла бары да 42,1 миллион киловатт-сагъат электрокюч чыгъаргъандыла. «РусГидро» компанияны республикада бёлюмюнде айтханларына кёре, ол алгъын жылланы орта кёрюмдюлери тенгли бир болады.

Шёндю суула кётюрюлюр кезиу башлана турады да, станцияланы барында да анга хазырланнгандыла. Аны чеклеринде специалистле оборудованиягъа тынгылы къарап чыкъгъандыла, тозурагъанын кёрселе, жангысына алышадыла неда ремонт этедиле. Быллай ишлени кюзде окъуна башлаучудула. Заманында этилген мадарны хайырындан станцияла жаз башында чырмаусуз ишлейдиле.

Бёлюмню специалистлери бу кюнледе дагъыда Аушигерде станцияда бир гидроагрегатха тынгылы ремонт этип бошагъандыла. Эсге сала айтсакъ, Къабарты-Малкъарда сегиз ГЭС ишлейди. Аланы барыны да кючю 198,1 мегаватт болады.

Улбашланы Мурат.