КъБР-м и Парламентым и япэ мыгъэрей бжьыхьэ зэхуэсыр екIуэкIащ. Ар къыщIадзащ КъБР-м и Парламентым и депутат Бердюжэ Владимир дакъикъэкIэ хуэщыгъуэу.
- Нобэ Бердюжэ Владимир къытхэтыжкъым. ЗэхуэсыгъуиплIым и кIуэцIкIэ ар КъБР-м и Парламентым и депутату щытащ, иужьрей тIум КъБР-м и Парламентым и Президиумым хэтащ, Лъэпкъ зэхущытыкIэхэмкIэ комитетым и унафэщI къулыкъур ирихьэкIащ. Ар пщIэ зиIэ, республикэм фIыкIэ зи цIэ къыщраIуэ цIыхут. «УФ-м и мэкъумэш IэнатIэм щIыхь зиIэ и лэжьакIуэ» цIэр зыхуагъэфэща унафэщIым и гуащIэ зыхилъхьа «Ленинцы» мэкъумэш кооперативыр ди республикэм и мызакъуэу, къэрал псом къыщацIыху, - жиIащ КъБР-м и Парламентым и УнафэщI Егоровэ Татьянэ.
ЗэIущIэм щытепсэлъыхьащ Iуэхугъуэ 50-м нэблагъэм. Абыхэм яхэтащ республикэм и законопроект зыбжани. Апхуэдэщ, къапщтэмэ, «Унагъуэм, анэ-адэм, быным къащхьэщыжыным и IуэхукIэ» КъБР-м и Законым и 21-7 статьям зэхъуэкIыныгъэхэр хэлъхьэным теухуауэ» законопроектыр. КъБР-м и Парламентым ЛэжьыгъэмкIэ, социальнэ политикэмрэ узыншагъэр хъумэнымкIэ комитетым и унафэщI Къэжэр Хъусейн къызэрыхигъэщамкIэ, зи гугъу ящIа законым и проектыр КъБР-м и Правительствэм къыхилъхьащ зи ныбжьыр илъэси 3 - 7 хъу сабий зиIэ унагъуэ хуэмыщIахэм мазэ къэс УФ-м и Президентым и унафэкIэ ират ахъшэ дэIэпыкъуныгъэм тещIыхьауэ.
«Языныкъуэ IэнатIэхэм я лэжьакIуэхэм я улахуэм теухуауэ» КъБР-м и Законым и 4-1 статьям халъхьэну зэхъуэкIыныгъэхэу КъБР-м и Правительствэм къигъэлъэгъуахэм зэIущIэм щыхэплъащ. Апхуэдэхэм ящыщщ ФIэкIыпIэ зимыIэ медицинэ страхованэм и щIыналъэ фондым и унафэщIым, абы и къуэдзэхэм, бухгалтер нэхъыщхьэм я улахуэхэр убзыхуныр КъБР-м и Правительствэм и унафэм щIэгъэувэныр. Дэфтэрхэр Iуэхум хэплъэн хуей IуэхущIапIэхэм ирагъэхьащ.
ЗэIущIэм щыхэплъащ УФ-м и нэгъуэщI щIыналъэхэм къикIыу сатум, псэущхьэхэм, УФ-м и хьэрычэт Iуэху цIыкIумрэ ику итымрэ ятеухуауэ къаIэрыхьа тхыгъэхэм, апхуэдэуи, УФ-м и Бюджет, Налог, Псы, ПсэупIэ, Ухуэныгъэ кодексхэм ехьэлIауэ къагъэлъэгъуа зэхъуэкIыныгъэхэм.
Унафэ къащтащ IэнатIэ щхьэхуэхэм я лэжьакIуэ къыхэжаныкIахэр КъБР-м и ЩIыхь тхылъкIэ ягъэпажэну.
КъБР-м и Парламентым ПромышленностымкIэ, транспортымкIэ, связымрэ гъуэгу хозяйствэмкIэ и комитетым и унафэщI Байдаев Салихь зэIущIэм хэтхэр щигъэгъуэзащ КъБР-м и цIыхухэм ягъуэт транспорт Iуэхутхьэбзэр егъэфIэкIуэным теухуауэ къагъэлъэгъуауэ щытахэр зэрагъэзэщIам.