ЩыIэщ цIыху, сыт хуэдэ IуэхугъуэкIи уепсэлъэфу, сытри екIуу къехъулIэу, и щIэныгъэмрэ зэчиймрэ гъунэ имыIэу къыпщыхъуу. Апхуэдэхэм ящыщщ Дудар Зарэ. Абы мы гъэм къыдигъэкIа «Волшебство массажа» тхылъым теухуауэ къэзгъэпсэлъэну арат сыщIыхуэзар. Ауэ а бзылъхугъэм апхуэдизым хищIыкIыу, IэщIагъэрэ щIэныгъэкIэ уехъуэпсэну зэрыщытыр къыщызгурыIуэм, ди уэршэрыр кIыхь хъуащ, пэжыр жысIэнщи, гупсэхугъуэ хэслъагъуэу гъэщIэгъуэну екIуэкIащ. 
- СызэрыщыгъуазэмкIэ, За­рэ, биологиещ узы­хуе­джар. Ауэ къэфакIуэ, ди­зайнер, продюсер, тхакIуэ жыпIэми, гъуазджэм и лIэужьыгъуэ куэдым уи цIэ щыбгъэIуащ. Иужьым хьэ­рычэтыщIэ ухъужащ СПА-салон, «НасыпыфIэ ныбжь 40+» зэгухьэныгъэ, масса­жым и школ, нэгъуэщIхэри къызэIупхри. А псори къы­зыхэкIыр сыт?
- Дахагъэм! СызэрыцIыкIурэ дахэр си нэми си псэми фIэфIу сыкъэхъуащ. Арагъэнт щхьэцщIэщэ сыхъуну сыщIэ­хъуапсэр. Нобэр къыздэсым си нэгу щIэтщ зы теплъэгъуэ… Илъэси 4 сыхъуми арат абы щыгъуэ. «Кабардинка» ан­самблым и къэфакIуэ гъуэ­зэджэ Шэру Соня пыIэ гъэ­щIэгъуэнхэр щхьэрыгъыу, бос­тей екIухэр щыгъыу, Iэп­щэхъу, тхьэгъу, Iэлъын те­лъы­джэхэр Iэрылъу, пащтыхь гуащэм хуэдэу щIыкIафIэу, щабэу, хуэму зигъазэу, и щхьэцыр дахащэу и дамэм телъу таксим ису пщэдджыжь къэс слъагъурт. Сэ ар зыкIэ сфIэдахэти, ситхьэкъуауэ, жьы схуримыкъуу сыкIэ­лъы­плъырт. Балигъ сыхъуа нэу­жьи аращ дахагъэм и пща­лъэу сиIар. Соня и щхьэцым тхъун щыщIидзам абы и ныбжьым сынэсу сысейми тхъун щы­щIидзэнур къысхуэ­гъэсыр­тэкъым. Гъуазджэм, даха­гъэм, щIэщыгъуэм си гур ху­зэIухауэ сыкъэтэджащ. 
- Арами, биологие къуда­мэрщ узыщIэтIысхьар…
- ЩIэныгъэм пщIэ щыхуащI унагъуэт сыщалъхуари, а сэ сыкъезыхуэкI дахагъэм зыри хуаIуэхутэкъым, ипэжыпIэкIэ. ЦIэрэ щхьэрэ уиIэн папщIэ щIэныгъэрылажьэу ущытын хуейт а зэманми, нэхъ сы­зыхэзагъэр биологиети, абы сыщIэтIысхьащ. Ари пщыхьэ­щхьэкIэ сыкIуэу арат, махуэкIэ сылажьэрт, сыкъафэрт, гас­тролхэм сыкIуэрт. Сыхуэ­мей­уэ, залымыгъэкIэ къэ­зухауэ схужыIэнукъым, сфIэгъэ­щIэ­гъуэнт, седжэфырти седжащ, ауэ а IэщIагъэм сыкъы­теувыIэну зэи сыхуеякъым. 
- Сытыт-тIэ, псом нэхърэ нэхъ пфIэфIыр?
- Сэ зы Iуэхум теубыдауэ куэд­рэ сылэжьэфыркъым. Ауэ сызэрыныбжьыщIэрэ цым срилэжьэну, пыIэ, пщэ­дэлъ, фэилъхьэгъуэ зэхуэмы­дэхэр сщIыну сфIэфIт… ЩIэх дыдэ къызгурыIуащ дизай­ным сызэрыхэзэгъэнур. Си гъащIэ псор абы еспхыну сыхуеяуи схужыIэнукъым. Театрхэм, гимнастхэм, къэ­факIуэхэм щхьэкIэ щыгъын къэзгупсысу сылэжьащ. Къэ­факIуэхэм сахэтти, хамэ къэралхэм дашэурэ зыкъы­щыд­гъэлъа­гъуэрт, ди нэгу зедгъэужьырт. Ари си псэм щыщт. 2012 гъэ лъандэрэ массажым сы­ди­хьэхати, гу­къыдэжышхуэ пы­мылъу сы­зыхуеджа биологиер къы­щысхуэсэбэпащ мыбдеж. «Волшебство массажа» тхы­лъымкIэ цIыхухэм садогуашэ Iэпкълъэпкъыр пшытIэурэ узы­фэ зэхуэмыдэхэр зэры­пхуэ­гъэхъуж IэмалхэмкIэ. Ар дэтхэнэ зыми къызэры­гу­рыIуэн бзэ тыншкIэ тхащ, алъандэрэ кIэлъыплъыны­гъэу езгъэкIуэкIар щызэхуэс­хьэ­сащ. Псалъэм папщIэ, цIыхур махуэ псом щысу мэ­лажьэ. Гу лъимытэу и Iэ­фракIэр зэ­пымычу дзакIэм щехъуэ компьютеркIэ щы­лажьэм деж е зигъазэурэ тхылъымпIэ къыдегъэкI. ЦIыхур къыхуи­гъэщIакъым апхуэдэ лэжьэ­кIэми, и тхыцIэм екIуалIэ лып­цIэхэр зэщIонэ, мэбэг, узын щIадзэ, цIыхур Iушэ мэхъу, къеузри ­ар къызыхэкIари къыгурымы­Iуэу. ЛыпцIэ зэ­щIэнам къепха Iэпэхэр е Iэр зэрыщыту ундэ­рабжьэу, пы­диикIыу щIедзэ. ЦIыхум и ла­жьэр къыгу­рымыIуэу доху­тырым деж макIуэри, хущхъуэ зэхуэ­мыдэхэр кърахьэлIэ, ауэ дызытепсэлъыхь щытыкIэхэр хуэгъэкIуэдыркъым. Мис ап­хуэдэхэращ массаж хуэ­ны­къуэр. Узыр къызыхэкIар къэпхутэмэ, тынш дыдэу пхуогъэхъуж. 
- Зарэ, пхужыIэну а Iэ­щIагъэм укъытеувыIэну хьэмэрэ иджыри уи гур ныкъуакъуэрэ? Зыгуэр къэ­плъыхъуэрэ?
- СхужыIэнукъым. Сэ хуиты­ныгъэр сфIэфIщ. Си гур утIыпщауэ сопсэу. НэгъуэщI зыгуэрым сыдимыхьэхыну, си IэщIагъэри сымыхъуэжыну схужыIэнукъым. Ауэ сызы­пэ­рыувар псом нэхърэ нэхъыфIу сщIэуэ, си къарур зэрыщыту абы тезухуэу сесащ. 
- Уи IэщIагъэр къыпIэщIэу­жагъуэу, зыри ухуэмеижу утыку укъимынэн папщIэ, илъэсипщI къэс пхъуэжын хуейуэ жаIэ психологхэм…
- Пэжщ ар. Уи лэжьыгъэр къыпIэщIэужэгъуэн щыщIи­дзам деж, IэщIыб пщIырэ нэгъуэщI зыгуэрым упэ­рыу­вэмэ нэхъыфIщ. Узэны­къуэ­къужу пфIэмыфI лэжьапIэм укIуэн нэхъ жагъуэ щыIэкъым. Апхуэдэ гукъеуэ уи гум имылъу, хуиту убауэу упсэумэ, гъащIэр сыт хуэдэу IэфIу къыпщыхъурэ!
- УзыхущIегъуэжыр сыт, Зарэ?
- Сыхуейт нэгъуэщI зэма­ным сыхалъхуэну. Ныбжь дахэм ситу иджырей зэманым сы­хэпсэукIыну. Хуиту къэрал­щIыб сыкIуэу, сызыхуейм сыхуеджэу, хамэ къэра­лы­бзэ­хэр зэзгъащIэу, IэмалыщIэхэр къэзгъэсэбэпурэ си Iуэхур згъэкIуатэу сыпсэуарэт жыс­Iэу сохъуапсэ. Ди нобэрей щIалэгъуалэм къагу­рыIуэр­къым къызыхэкIар. Куэдым я гъащIэр ягъакIуэ, Iэмал хъушэхэр благъэкIыу. Пэжщ, цIыху псори зэхуэдэкъым, зыщIэхъуэпсри зытехуэр­къым, ауэ сэ быдэу си фIэщ мэхъу цIыхур щхьэхуиту къигъэщIауэ, и гур утIыпщарэ и бгъэм щызу бауэу псэун хуейуэ. 
Епсэлъар
Фырэ  Анфисэщ.