Бу кюнледе Владимир Вороков атлы КъМР-ни Культура фондунда бизни республикада жашагъан бирси халкъланы миллет маданият аралары эмда жамауат организацияларыны келечилери да жыйылып, тюбешиу озгъанды. Ол «Мени тилим – мени жаным!» деген ат бла къуралгъанды эмда «Шуёхлукъну тагылары» деген фестивальны чеклеринде бардырылгъанды. Аны хурметли къонакълары уа Россейни халкъ артисткасы Наталья Гасташева, Россейни сыйлы артисткасы эм КъЧР-ни халкъ артисткасы Таукенланы Галина болгъандыла.
Жыйылгъанланы араларында сёлеше, сагъынылгъан фондну таматасы Люаза Макоева хар халкъ да кесини тили эмда миллет энчиликлери бла сейир болгъанын, ол башхалыкъланы хайырлары бла уа бизни барыбызны да кёз къарамыбыз кенгергенин эсгертгенди. Ата-бабаладан бери да тёлюледен тёлюлеге эм багъалы байлыкъча къала келген хазнаны, тас этип къоймай, андан ары сакълауну, айныта да барыуну магъанасын чертгенди.
Тюбешиуню кезиуюнде адам санлары аз болгъан халкъланы ана тиллерин сакълау жаны бла проблемаларыны юсюнден да айтылгъанды. Сёз ючюн, белгили журналистибиз Ботталаны Мухтар да сёлешгенди аны юсюнден. Ол жаш заманында Расул Гамзатовну «Язык языку не враг» деген статьясын къалай сейир этип окъугъанын, анда айтылгъан затла бюгюннгю жашауубузда да кертиликлерин ачыкълап тургъанларын чертгенди. Миллет адамланы араларында шуёхлукъ болса, аны кючю бла аланы халкъларыны культуралары да байыкълана баргъанын закийибиз Къулийланы Къайсынны, Мустай Каримни юлгюсюнде ачыкълагъанды.
Ана тил тас болса, миллет да жокъ боллугъун а кесини убых шуёхуну юсюнден хапарлай, ангылатханды. Бюгюнлюкде, жарсыугъа, бу миллетденбиз деп айтырча адамла болгъанлыкъгъа, ала ёз тиллерин билмегенлерин, анда эрттеден бери сёлешген инсан да болмагъанын эсгертип, хар бирибиз да кесибизни ана тилибизни билирге, андан сора да, аны бирсилеге юйретирге да тийишли болгъаныбызны чертгенди.
Жаш тёлю ёз ана тилине тюшюнюр эмда аны толусунлай ангылар ючюн а ёсюп келгенлеге аны эшитдиргенлей турууну магъанасы терен болгъанын белгилегенди. Сабийликден эшите турса, ол аны эсинде къаллыгъын, кеси да аны жюрютгенледен боллугъун ангылатханды. Алай бла уа, тил да тас болмай, халкъ да айный барлыгъына ийнандыргъанды.
Ингирде миллет жамауат организацияланы келечилери ёз халкъларыны ана тилле бла байламлы проблемаларын билдиргенлеринден, ол затха жарсыгъанларындан сора да, назмула окъугъандыла, жырла айтхандыла. Жырланы уа миллет тепсеуле алыша, ызы бла макъамла да эшитиле, миллет тиллени бла маданиятланы энчиликлерине, сейирликлерине эмда ариулукъларына тюбешиу дагъыда бир кере тюшюндюргенди.
Мокъаланы Зухура.
Суратланы Элина Караева
алгъанды.