«Россей Федерацияда къырал контрольну (надзорну) эм муниципал контрольну юсюнден» 248-чи федерал законнга кийирилген жангы излемлеге кёре, от тюшюуге къоркъуусузлукъну жалчытыу жаны бла къырал инспекторла тохташдырылгъан планнга тийишлиликде учреждениялада профилактика тинтиуле бардырыргъа борчлудула. Аны чеклеринде Россейни МЧС-ини регионда Баш управлениясыны келечилери жангы окъуу жыл башланнганы бла байламлы билим бериу учреждениялада профилактика ишле бардырадыла. Тинтиуле битеу да 653 организацияда ётерикдиле.
Бу кюнледе инспекторла Нальчикни 32-чи номерли мектебинде болгъандыла, алада къоркъуусузлукъну жалчытыу жаны бла документлени тюзлюклерине къарагъандыла. Къутхарыучула школну администрациясы, устазла бла ушакъла, инструктаж бардыргъандыла, от тюшгенини юсюнден билдирген сигнализацияны ишлетип кёргендиле.
Сентябрьни биринчи жарымында от тюшюуге къажау тематикагъа агитация-пропаганда иш тамамланырыкъды, аны мураты республиканы окъуучуларыны бу жаны бла билимлерин ёсдюрюудю, къыйын болумлада кеслерин тюз жюрютюрге юйретиудю.