КъМР-ни Правительствосуну председателини биринчи орунбасары Сергей Говоров бардыргъан кенгешде сёз республикада эллени газ бла жалчытыуну юсюнден баргъанды. Жыйылыугъа промышленность, энергетика эм сатыу-алыу министр Шамиль Ахубеков, «Газпром межрегионгаз Нальчик» компанияны башчысы Залим Вороков, районланы эмда шахарланы администрацияларыны келечилери да къатышхандыла.
Сергей Говоров айтханыча, кенгешни чеклеринде Правительствону председатели Мусукланы Алий берген талай буйрукъла къалай толтурулгъанын сюзерге керек эди. Эм биринчиден а газ ызланы тартыу жаны бла план-график жарашдырылгъанын кёрюрге тийишлиди.
«Программагъа тийишлиликде 2023 жылгъа дери газ ызла болгъан элледе аны юйлени неда участкаланы къатларына дери жетдирирге керекди. Алай болурча уа муниципалитетле эмда газ бла жалчытыучу компания ишни бирлешип тамамларгъа борчлудула», - деп чертгенди Шамиль Ахубеков.
Жер-жерледе не мадар этиллигини юсюнден районланы эмда шахарланы администрацияларыны келечилери хапарлагъандыла. Ол санда ызлагъа неллай бир юй къошулгъанын эмда быргъыланы ненчасына келтирирге кереклисин да туура этгендиле.
