Алай бла Къабарты-Малкъарны сыйлы артисти, Къарачай-Черкесни бла Ингушетияны халкъ артисти Текуланы Амур 5642 метр бийикликде «Эльбрус-красавец» деген жырын айтханды. Элбрусха ёрлеу жырчыгъа къыйын болмагъанды. «Биз тынгылы хазырланнганбыз, хауаны энчиликлерине юйреннгенбиз, кюню халы да иги болгъанды. Республикабызда жашагъанланы, аны къонакъларын да Европаны эм бийик тауундан Къыраллыгъыбызны кюню бла алгъышлагъан манга бек магъаналы эди», - дегенди Текуланы Амур.
Экинчи рекорд да искусство жаны бла болгъанды. Иткъол талада, 2080 метр бийикликде, «Балкария», «Кабардинка», «Терк къазакъла ансамбльледен 100 тепсеучю регионда жашагъан миллетлени тепсеулерин кёргюзтгендиле.
Ызы бла уа Дуния рекордланы кюнюню чеклеринде чёгюп ёрге къобууда рекорд жангыртылгъанды. Ол да Иткъолда ётгенди, анга 400-ден аслам адам къатышхандыла, аланы араларында Элбрус районну акъсакъаллары, къоншу субъектледен да къонакъла болгъандыла. Аланы араларында эм гитчеге 1 жыл, эм абаданнга уа 85 жыл толгъанды.