КъМР-ни Башчысы Казбек Коков «инвестициялы сагъатны» бардыргъанды, анга къонакъ юйле ишлеу жаны бла кюрешген инвесторла къатышхандыла.
Казбек Коков айтханнга кёре, республикада къонакъ юйлени санын кёбейтиу бюгюнлюкде уллу магъананы тутады, нек дегенде шёндю окъуна келген туристлени орнатыу бла къытлыкъ барды.
Къыралны оноучулары ич туризмни айныууна уллу эс бурадыла. Аны бла байламлы «Туризм эм къонакъ алыу индустрия» деген миллет проект ишлейди, Россейни ичинде жолоучулукъ этип айланнганлагъа къырал субсидияла да бериледиле.
КъМР-ни Курортла эм туризм жаны бла министерствосу билдиргеннге кёре, жылны алты айына республикагъа 520 минг турист келгенди, ол кёрюмдю пандемия башланнгынчы 2019 жыл бла тенглешдиргенде, 43,4 процентге кёпдю. Этилген тергеулеге кёре, жылны ахырына дери республикагъа бир миллионнга жууукъ жолоучу келликди.
Адамла къуру тау-рекреация жерлеге барып къалмай, Нальчик санаторий-курорт комплексге да аслам келедиле. «Нальчикни федерал магъанасы болгъан курортча айнытыугъа биринчи атлам этилгенди, мастер-планы жарашдырылгъанды, анга кёре инвесторла бла къыйматлы эм бир муратлы болуп ишлерге онг барды. Аллай мастер-планла республиканы туристле келген бирси жерлеринде да жарашдырыллыкъдыла»,- дегенди республиканы оноучусу.
«Инвестициялы сагъатда» кёргюзтюлген проектлени хайырланыу жаны бла онгла сюзюлгендиле.
Биринчи инвестпроектге Нальчикде Шогенцуков-Лермонтов орамланы мюйюшлеринде орналгъан алгъын Туристлени юйлери болуп тургъан мекям кёргюзтюлгенди. Аны къонакъ юйле бла кюрешген халкъла аралы компания шёндюгюлю комплекс этерикди. Тарых магъанасы болгъан мекямны сыфаты сакъланырыкъды, анда инвестор эки жылны ичинде 120 жери болгъан къонакъ юй ачарыкъды.
Экинчи къонакъ юй Нальчикни Ленин атлы проспектинде боллукъду, аны хайырланыргъа 2022 жылда берликдиле. Анда бу жерли суратчыланы эм халкъ чыгъармачылыкъ бла кюрешгенлени кёрмючлери бардырыллыкъдыла.
Ючюнчю проект «Маяк» санаторий курорт комплексни мурдорунда боллукъду. Анда сабий реабилитация ара ачаргъа мурат барды, бир ызгъа 100 адамны алыргъа онг боллукъду, андан сора да, сабийлени жууукълары жашарча да жерле къураллыкъдыла.
-Битеу проектле инфраструктура эм административ болушлукъ аллыкъдыла, аланы жашауда бардырыу турист бёлюмню айнытыууна себеплик берликди. Мындан ары да кёргюзтюлген хар инвестиция проектге тынгылы къарарыкъбыз, - деп белгилегенди республиканы Башчысы.
«Инвестициялы сагъатны» ахырында Казбек Коков правительствогъа башда сагъынылгъан проектлени тамамлауда инвесторла бла бирлешип ишлерге буюргъанды. Аллай ишни муниципал даражада бардырыргъа кереклиси да айтылгъанды.