Орус география обществону «Альтаир» жаш тёлю клубуну башчысы Мокъаланы Тенгиз Россейни Къорууланыу министерствосуну «Излеу ишде айырмалылыгъы ючюн» ючюнчю даражалы белгиси бла саугъаланнганды. Анга белгини къууанчлы халда республиканы Парламентини спикери Татьяна Егорова бла аскер комиссарны орунбасары Антон Будаков бергендиле.
Саугъалау Уллу Ата журт урушну кезиуюнде мамыр жашагъан адамла чекген азаплыкъны, нацистлени эм аланы болушлукъчулары этген зорлукъну юсюнден «Без срока давности» деген ат бла сакъланнган архив документлени кёрмючлерин къурау бла байламлы бардырылгъанды. Мокъаланы Тенгиз Кавказ ючюн жан берген совет аскерчилени ёлюклерин табыугъа салгъан къыйыны эм жаш тёлюню патриот ниетледе юйретгени ючюн дайым саугъаланнганлайын турады. 2015-2019 жыллада ол Минги тауда эм Курп бийикликледе жоюлгъан аскерчилени излеуге къатышханды, «Эсгериуню вахтасыны» чеклеринде тамамланнган жумушланы, излеу отрядланы ишлерини юсюнден билдириуле этгенди.
2016 жылда ол «Россейни патриоту» XV битеуроссей журналист конкурсда хорлагъанды, Россейни тарых хазнасын сакълаугъа этген къошумчулугъу эм «Эсгериуню вахтасы – Элбрус 2016» акциягъа тири къатышханы ючюн Къабарты-Малкъарны Правительствосуну Башчысыны ыразылыкъ къагъытына тийишли болгъанды.
«Альтаир» жаш тёлю клубда ёсюп келгенлени Ата журтха сюймекликде юйретиуге уллу эс бурулады. Сёз ючюн, 2019 жылда анда «Хорламны жоллары» деген проект бардырылгъанды. Аны кезиуюнде жаш адамла Къызыл Аскер вермахт бла уруш этген бийик тау этекледе болгъандыла, аланы жигитликлери бла шагъырейленнгендиле. «Альтаирни» келечилери регионда Уллу Ата журт урушну, Уллу Хорламны эсгериу бла байламлы къуралгъан ишлеге дайым къатышадыла.
