Казбек Коков Нальчикде межгитге барып, анда тындырыла тургъан тынгылы ремонтха къарагъанды. Республиканы Башчысы КъМР-ни Муслийманларыны дин управлениясыны председатели Хазратали Дзасежев эм КъМР-де граждан обществону институтлары бла байламлыкъла къурау эмда миллетлени ишлери жаны бла министрни къуллугъун толтургъан Анзор Курашинов бла мекямгъа эм отоулагъа къарагъандыла.
Межгитни ремонту тири бардырылады. Отоулада шёндюгюлю тапландырыу ишле этиледиле, эски инженер ызла алышындырылгъандыла, жылыу берген система игилендирилгенди, заллагъа жарыкълыкъ тап келирча болгъанды. Намаз къылгъан жерледе дезинфикация онгла къуралгъандыла, хауаны рециркулятору салыннганды.
Жюзле бла ийнаннган адамла келген мекямгъа ремонт этилирге кереклисини юсюнден регионну оноучусу бла алгъыннгы тюбешиуледен биринде КъМР-ни Муслийманларыны дин управлениясыны башчысы Хазратали Дзасежев айтхан эди.
Республиканы баш межгитин жангыртыу бла байламлы жумушлагъа бизнес бла кюрешгенле да себеплик этгендиле. Нальчикни намаз этиучю мекямы энди жылыракъ, жарыгъыракъ, келгенлеге, дин управленияны келечилерине да бютюн ырахатлы боллукъду.