Россей Федерацияны Жарыкъландырыу министерствосу «Бюгюннгю школ» федерал проектни «Билим бериу» национал проекти саулукълары бла байламлы чекленнген онглары болгъан сабийлени окъутууда 2020 жылда жашауда къалай бардырылгъаныны эсеплерин чыгъаргъанды. Алай бла «Доброшкола» деген Битеуроссей конкурсну «Мектепни эм ахшы айнытхан бёлюмю» номинациясында Къабарты-Малкъарны Прохладный шахарында орналгъан ючюнчю номерли энчиленнген (коррекциялы) школ-интернаты ючюнчю жерге чыкъгъанды.
Аны бла байламлы бу кюнледе КъМР-ни Жарыкъландырыу, илму эмда жаш тёлюню ишлери жаны бла минитерствосунда сагъынылгъан мектепни келечилерин саугъалаугъа жораланнган къууанчлы тюбешиу озгъанды. Анга ведомствону министрини орунбасарлары Екатерина Мисостова бла Мокъаланы Ачемез, сабийликни эмда коррекциялы билим бериуню социал къоруулау бёлюмюню башчысы Хучиналаны Мадина къатышхандыла.
Интернатдан келгенлени Екатерина Николаевна алгъышлагъанды. Ол бизни республика «Доброшкола» эришиуде призёрланы санына къошулгъаны коррекциялы окъутууда ышаннгылы атлам болгъанын ангылатханды. Бу проектни чеклеринде сагъынылгъан школгъа сегиз миллион чакълы бёлюннгенин, ол санда регионлу бюджетден да 3,5 миллион берилгенин айтханды. Аны хайыры бла уа коррекциялы интернатны ырысхы-техника мурдорун иги да жангыртыр онг чыкъгъанын билдиргенди.
Алай бла окъуу эмда энчи кабинетлеге, урунуу предметден юйретген мастерскойлагъа, библиотекагъа тынгылы ремонт этилгенди. Ол а мында билим алгъан жашчыкълагъа бла къызчыкълагъа энчи, ала тюшюналырча билим бериу программалагъа тийишлиликде ишлерча амалланы къурайды. Андан сора да, мебельни жангыртылгъаны да кёзню къууандырады.
Екатерина Мисостова билдиргеннге кёре, быйыл дагъыда эки энчи коррекциялы мектеп-интернатны ырысхы-техника базасын игилендирир мурат барды. Ала Приближная станицада бла Заюковода орналгъанладыла. Андан сора да, быллай жумушну 2022 жылда аны мурдорунда сабийлени-инвалидлени дистанцион халда окъутуу къуралгъан биринчи номерли школ-интернатда да бардырыргъа белгиленеди.
Ызы бла хычыуун жумуш башланнганды. Алай бла КъМР-ни Жарыкъландырыу, илму эмда жаш тёлюню ишлери жаны бла министерствосуну сыйлы грамоталары бла призёр даражагъа чыкъгъан махкемени директоруну къуллугъун толтургъан Ирина Колесникова, штукатур-маляр жумушлагъа тюшюндюрген устазы Никита Пилипчак, педагог-библиотекачы Алла Вермиева саугъаланнгандыла.
Бизни бла къысха ушагъында Ирина Михайловна коррекциялы школ-интернатда бюгюнлюкде 75 сабий тургъанын, аланы жыл санлары жетиден онжетиге дери болгъанын билдиргенди. Мында асламысында аланы окъургъа, санаргъа, тёшек-жастыкъ тышла тигерге, къурулушда керекли жумушлагъа, башхача айтханда уа, мектепден чыкъгъанларындан сора кеслерини къабыргъаларын жашаугъа таяндыра билирге юйретгенлерин ангылатханды. Аны себепли уа энди алада хар нени да жангыртылгъаны, бери ноутбукла, принтерле, жангы оборудование келтирилгени жашлагъа бла къызлагъа усталыкъгъа тюшюнюрге ахшы онг болгъанын саулай да махкемени онеки бёлюмюне тынгылы ремонт этилгенин айтханды.
Эсгерте кетейик, «Доброшкола» Битеуроссей конкурс 2020 жылда экинчи кере бардырылгъанды. Анга битеу да къыралдан 130 энчиленнген (коррекциялы) мектеп-интернат къатышханды. Проектге къошулур ючюн а алагъа хар бирине кеслерини регионларындан да танг кесек ырысхы бёлюннгенди.
Эришиу озгъан жылда дистанциялы форматда эки урумгъа юлешинип озгъанды. Аны башха-башха номинацияларында жаланда тогъуз махкеме саугъагъа тийишли кёрюлгенди. Бу проект чекленнген онглары болгъан сабийлени жашауда тюбеген болумлагъа тюшюндюрюуге тутхучлулукъда къуралгъанын эсге алсагъ а, аны мындан ары да бардырыллыгъы кёллендирген, ышандыргъан да этеди.
