КъМР-ни Башчысы Казбек Коков республиканы ара район медицина учрежденияларына терк болушлукъ тапдыргъан автомобильле бергенди. Улоула былтыргъы жылны ахырында КъМР-ни Саулукъ сакълау министерствосуну бла РФ-ни Минпромторгуну араларында 14 миллион сомдан артыкъгъа тохташдырылгъан келишимге кёре алыннгандыла. Алай бла район больницала 25 автомобиль къоллу болгъандыла, аладан 19-су Lada Granta маркалыдыла, 6-сы – Lada Niva (беш эшиклиле).
Ахыргъыла бийик-тау элле болгъан районлагъа берилгендиле: Черек, Зольск, Элбрус, Чегем, эмда Районла аралы кёп профильли больницаны Лескен подразделениясына. Къалгъан улоула да ара район больницаланы араларында юлешиннгендиле. Ол участковый службалагъа амбулатор саусузлагъа терк болушурча, алагъа дарманланы заманында жетдирирча онгла береди.
Жыйылыугъа КъМР-ни Правительствосуну Председателини орунбасары Марат Хубиев, КъМР-ни Башчысыны Администрациясыны таматасы Мухамед Кодзоков, КъМР-ни саулукъ сакълау министри Рустам Калибатов, Нальчик шахар округну жер-жерли администрациясыны оноучусу Таймураз Ахохов, медицина организацияланы тамата врачлары эм ишчилери къатышхандыла.
Казбек Коков транспорт къошумчулукъ терк болушлукъ тапдырыуну игилендирлигин эм сменагъа онла бла вызовлары болгъан участковый врачланы къыйын ишлерин женгиллендирлигин белгилегенди. Регионну таматасы республиканы медицина махкемелерини келечилерин жангы жыл бла алгъышлап, саулукъ-эсенлик, жетишимле тежегенди.
Алай бла он жыл жангыртылмай тургъан регион саулукъ сакълау терк болушлукъ тапдыргъан службаны паркы эки жылгъа 66 автомобиль бла толтурулгъанды. Жангы машинала коронавирусха къажау болумлада ишлери асламысында тышына чыгъып бардырылгъан биринчи звенону врачларына ахшы болушлукъдула.
