КъМР-ни Башчысы Казбек Коков тюнене Къабарты-Малкъарда хар заманда да ишлеп тургъан Право низамны жалчытыу жаны бла Координация кенгешни бла Экономика эмда жамауат къоркъуусузлукъ жаны бла советни бирикген жыйылыуун бардыргъанды. Анда эм алгъа республикада жашагъанлагъа хыйлачыланы (мошенничество) хаталары жетгенини юсюнден айтылгъанды.
Анга Россейни ФСБ-сыны КъМР-де управлениясыны начальниги Сергей Воронин, ич ишле министр Василий Павлов, РФ-ни Следствие комитетини бизни регионда следствие управлениясыны таматасы Андрей Потапов, КъМР-ни прокурору Николай Хабаров къатышхандыла. Право сакълагъан органланы башчылары республиканы оноучусуна инсанланы эркинликлерин эмда сейирлерин сакълаугъа бурулгъан амалланы, тинтиулени къалай бардырылгъанларыны, аманлыкъчылыкъны тыйыуну юсюнден билдиргендиле.
Бюгюнлюкде аманлыкъчыланы къауумунда болгъан бир ненча адам баямланнганды эмда тутулгъанды. Аланы этген хаталарына тийишлиликде РФ-ни Уголовный кодексини 159 (мошенничество) эмда 172.2 (ахча неда башха ырысхыны тюшюрюр ючюн къуралгъан ишле) статьяларына кёре уголовный ишле ачылгъандыла. Полицияны келечилери бу къужур иш бла байламлы битеу да шартланы тохташдырыу эмда терсликлери болгъанланы жууапха тартыу жаны бла керекли тинтиу-оператив комплекс жумушланы бардыра турадыла.
