Кёп болмай Жангы жылны аллында «Демография» миллет проектге кёре КъМР-ни Жарыкъландырыу, илму эмда жаш тёлюню ишлери жаны бла министрини къуллугъун толтургъан Анзор Езаов къатышып республикада бир ненча ясли ачылгъанды.
Ол санда Нальчикни 52-чи номерли прогимназиясы бла «Горный» микрорайонда сабий садны аллында юч жылларына дери 80 сабийге эки ясли блок ишленнгенди. Аланы ойнарча, жукъларча отоулары, медицина кабинетлери, хамамлары эм спорт заллары да барды. Арбазларында да горкала, агъачдан юйчюкле, юзмезлери бла орунла салыннгандыла эм тёгерек-башларын да айбатландыргъандыла. Энди аны хайыры бла «Стрелка» бла «Горный» микрорайонлада школгъа дери билим бериу учреждениялагъа жерлени сакълагъанланы толу жалчытырча болгъанды. Биринчи къауум байрам кюнледен сора жюрюп тебирерикди.
Бу кюнледе Къашхатауда да «Нюр» сабий садны арбазында 60 гитчеге ясли блокну къууанч халда ачылыуу болгъанды. Анга КъМР-ни жарыкъландырыу, илму эмда жаш тёлюню ишлери жаны бла министрини къуллугъун толтургъан Анзор Езаов, Черек муниципал районну администрациясыны башчысы Муртазланы Борис, Билим бериу управленияны келечилери эм башхала къатышхандыла.
Бир этажлы мекямны уллулугъу 800 квадрат метрге жетеди. Аны ойнаучу, жукълаучу отоулары, физкультура жараула бардыргъан залы, методика кабинетлери эм холлу да барды. Эшикде бюгюннгю излемлеге келишген сабийле ойнаучу майдан да къуралгъанды. Арбазы да айбатландырылгъанды эм тёгереги бла буруу тартылгъанды. Аны къурулушуна саулай 43 миллион сомдан аслам къоратылгъанды.
Эсге сала айтсакъ, 2019-2021 жыллагъа Къабарты-Малкъарда яслиледе жерле бла юч минг сабий жалчытылыныргъа керекди.
Курданланы Сулейман.