«Спартак-Нальчик» спорт клубну къарау комитетини бла Спорт министерствону бирикдирилген жыйылыулары болгъанды. Анга алда сагъынылгъан органны башчысы Хазратали Бердов, спорт министрни орунбасары Заур Хежев, республиканы олимпиада советини президенти Александр Заруцкий эм клубну директору Аслан Машуков къатышхандыла.
Жыйылыуну эсеплерине кёре «Олимп-ПФЛ 2020+2021» оюн сезонну ахырына дери команданы баш тренерини къуллугъун Заур Кибишев толтурлукъду, аны бла келишимни болжалы 2020 жылны ахырында тауусула эди. Бу ишге Заур Кибишев 2019 жылны декабринде салыннганды.
Тюрлениуле тренер штабда болгъандыла. Баш тренерни болушлукъчусуну къуллугъун Тимур Битоковну орунуна Ашамаз Шаков тамамларыкъды, ары дери ол «Спартакны» жаш тёлю командасына таматалыкъ этгенди. Вратарьланы хазырлагъан тренер Артур Кумыковну уа спартакчыланы алгъыннгы капитанлары Борис Шогенов алышындырлыкъды.
«Спартак-Нальчик» Тимур Битоковха бла Артур Кумыковгъа усталыкълары, ахшы ишлегенлери ючюн ыразылыгъын билдиреди эм клубну къауумунда урунургъа чакъырады.