«РусГидро» акционер обществону «Саугъагъа китап» деген жандауурлукъ программасыны кезиуюнде компанияны Къабарты-Малкъарда бёлюмюню келечилери Нальчикни ючюнчю номерли школ-интернатына саугъала бла баргъандыла. Анда кёзлери осал кёрген сабийлеге энчи жарашдырылгъан китапла, тюрлю-тюрлю илляула, китап окъуучу эм музыка согъуучу устройствола берилгендиле.
Компаниядан айтханларыча, ала бу огъурлу ишни «Саугъагъа китап» деген программача «Сокъур сабийлеге – сурат китапчыкъла» жандауурлукъ фонд бла бирге тамамлайдыла. Аны чеклеринде фонд кёзлери осал кёргенлеге меценатланы бла спонсорланы болушлукълары бла энчи китапла чыгъарады.
Ала суратланы къол бла тийип сезерча, не зат ишленнгенин тынч ангыларча жарашдырылгъандыла. Дагъыда алада жарыкъ бояула, музыка юзюкле, къагъытдан сора, башха тюрлю материалла да хайырланылгъандыла.
Китап бла бирге «Сейирлик карандаш» деген электрон къошакъ бериледи. Аны бетлеринде энчи жерлерине тийдирилсе, макъам эшитиледи неда ол бир затны юсюнден хапарлайды.
Сёзсюз, гитчелеге бу амал литератураны, искусствону дуниясына жууугъуракъ болургъа, белгили чыгъармала бла шагъырейленирге да онг береди. Къысхасы, быллай халда жарашдырылгъан жангы китапла сагъынылгъан сабийлеге бек уллу къууанчдыла.
Былтыр фонд эки комплект чыгъаргъанды. Биринчиси – «Къыраллагъа бла континентлеге жолоучулукъ» - гитче окъуучуланы къыралланы эмда миллетлени маданият байлыкълары бла шагъырейлендиреди. Экинчи комплект а «Алтын чач» эм «Сейирли нартюх» деген халкъ жомакъланы суратлайды. Аланы экисине да гитче театрчыкъ къурарча оюнчукъла, сабийни тилин, акъылын айнытхан элберледен толу конверт къошуладыла. Ол бары да жайгъанда декорация болгъан ариу орунда.
Бу жандауурлукъ программаны «РусГидро» 2007 жылдан бери бардырады. Аны кезиуюнде сабийлеге тийишли китапладан эки мингден артыкъ комплекти берилгенди.
Улбашланы Мурат хазырлагъанды.