|
КъБР-м и Iэтащхьэр лэжьыгъэ IуэхукIэ щыIащ республикэм и мэкъумэш IэнатIэ зыбжанэм
13 октября, 2020 - 06:43
Къэбэрдей-Балъкъэрым и Iэтащхьэ КIуэкIуэ Казбек Мэкъумэш хозяйствэмрэ мэкъумэшхэкIхэм елэжь промышленностымрэ я лэжьакIуэхэм я махуэм и пэ къихуэу щыIащ щIыналъэм и мэкъумэш IуэхущIапIэ зыбжанэм. КъБР-м и Iэтащхьэм щыгъуазэ зищIащ КъБР-м и Шэрэдж щIыналъэм хыхьэ Джэрпэджэж къуажэм щыIэ, мэкъумэшхэкIхэм елэжь «Шэрэдж ерыскъыхэкIхэр» кооперативым и Iуэху зытетым. Кооперативым хэтщ щхьэзакъуэ хьэрычэтыщIэхэр, мэкъумэш-фермер IуэхущIапIэхэм я унафэщIхэр.
2018 гъэм а IуэхущIапIэм гранту сом мелуани 7,168-рэ къыхуагъэфэщауэ щытащ я материально-техникэ лъабжьэр егъэфIэкIуэным трагъэкIуэдэн папщIэ.
Мы зэманым «Шэрэдж ерыскъыхэкIхэр» кооперативым и лэжьапIэ IэнатIэхэр ирегъэфIакIуэ, шэм щелэжьыну щIыпIэ иутIыпщын мурадкIэ. Абы папщIэ IуэхущIапIэм и унэр, метр зэбгъузэнатIэ 370-рэ хъур, зэрагъэпэщыжащ, апхуэдэуи зы жэщ-махуэм къриубыдэу шэ тонни 10-м щелэжьыфын папщIэ зыхуеину оборудованэхэр къащэхуащ. Мы зэманым ар егъэжьэным хуэунэтIа лэжьыгъэхэр ирагъэкIуэкI, Iэмэпсымэхэр зэтраухуэ. Шэм щелэжьыну линэр мы илъэсым и кIэм ирихьэлIэу лажьэу яутIыпщынущ. Кооперативым и мурадхэм щыщщ илъэсым гъэшхэкIыу тонн 3,650-рэ нэхърэ мынэхъ мащIэ къыщIагъэкIыу лэжьыгъэр зэтраухуэныр.
КIуэкIуэ Казбек а махуэ дыдэм щыIащ «Шэрэдж гибрид» IуэхущIапIэм, КъБР-м и Аруан щIыналъэм хыхьэ Шэрэдж Ищхъэрэ къуажэм щыIэм. А IуэхущIапIэр тегъэпсыхьащ гъавапхъэ, дагъэ къызыщIаху къэкIыгъэхэр хэсэным. Абы и мэкъумэш щIапIэхэм гектар 275-рэ яубыд. КърахьэлIэж гъавэр гъунэгъу щIыналъэхэм хурагъашэ, уеблэмэ хамэ къэралхэми иращэ. 2018, 2019 гъэхэм мы мэкъумэш IуэхущIапIэм зыщIагъэкъуауэ щытащ я лэжьыгъэр тэмэму зэтраухуэнымкIэ.
Мэкъумэш IэнатIэм къыщалэжь псоми я процент 56,5-р къэкIыгъэхэм, процент 43,5-рэ Iэщ гъэхъун IэнатIэм яхуозэ.
Дызэрыт илъэсым и щIышылэ - шыщхьэуIу мазэхэм, 2019 гъэм и апхуэ- дэ лъэхъэнэм елъытауэ, мэкъумэш IэнатIэм къыщалэжьар проценти 103,7-рэ, былымылрэ джэдкъазылу - проценти 102,2-рэ, гъэшу къашар проценти 104,6-рэ мэхъу. ДжэдыкIэу кърахым проценти 2,6-кIэ щIрагъэгъуащ икIи мелуани 137,7-рэ хъуащ. ФокIадэм и 1-м ирихьэлIэу хэхъуащ Iэщышхуэм и бжыгъэми.
Республикэм езым зыкъызэрегъэпэщыж пхъэщхьэмыщхьэ-мэракIуэхэкIхэмкIэ, хадэхэкIхэмкIэ, кIэртIофымкIэ, лымкIэ, шэмкIэ, джэдыкIэмкIэ.
Иужьрей илъэсхэм Къэбэрдей-Балъкъэрым Урысейм бжьыпэр щиIыгъщ псынщIэу къызыпыкIэ жыг хадэхэм зегъэужьынымкIэ.
ЩIыналъэм илъэс куэд хъуауэ щагъэкIхэм къадэкIуэу, хадэгъэкIхэм лIэужьыгъуэщIэхэми я пIалъэ зрагъащIэ, псалъэм папщIэ, шыгъулдыкъащхъуэр (голубикэ) гъэкIынми яужь ихьащ. Ар гектар 56,5-м щыхасащ икIи хъер хъарзынэ къитащ. Дызэрыт илъэсым абы и лIэужьыгъуэ гуэрхэм гектарым хуэзэу центнери 160-р къыпачащ.
Республикэр къэралым зэрыщыцIэрыIуэхэм ящыщщ нартыху гибрид жылапхъэхэр гъэкIыныр.
2019 гъэм апхуэдэу кърахьэлIащ тонн мин 15, абы щыщу тонн мин 11-р республикэм ирашащ, тонн 400-р хамэ къэралым иращэу. Жылапхъэр сертификацэм кIуэцIрыкIащ икIи щыIэ мардэхэм йозагъэ. Дызэрыт илъэсым нартыху гибрид жылапхъэу тонн мин 15-м щIыгъу кърахьэлIэну мэгугъэ.
КъимыдэкIэ, цIыхухэр бжьыхьэ-щIымахуэ лъэхъэнэм фIагъ лъагэ зиIэ пхъэщхьэмыщхьэхэмкIэ, хадэхэкIхэмкIэ къызэгъэпэща хъун папщIэ республикэм щолажьэ а ерыскъыпхъэ-хэр зыщIалъхьэ хъумапIэу 31-рэ, псоми зэхэту зэуэ тонн мин 210-рэ щIэхуэу. 2020 гъэм и кIэ пщIондэ пхъэщхьэмыщхьэ, хадэхэкI хъумапIэу иджыри 8 лажьэу яутIыпщыну я мурадщ. Абыхэм щIэхуэнущ тонн мин 35-рэ хуэдиз.
КъБР-м и Iэтащхьэмрэ Правительствэмрэ я пресс-IуэхущIапIэ.
|
12.05.2024 - 09:03 КъБР-м и Сабий, щIалэгъуалэ творчествэ унэм иджыблагъэ щекIуэкIащ урысейпсо зэIущIэ. |
|
11.05.2024 - 12:25 Зэ еплъыгъуэкIэ къыпщыхъунщ литературэр математикэм, социологием, физикэм, экономикэм, биологием, нэгъуэщI щIэныгъэхэми зыкIи емыпхауэ. |
|
11.05.2024 - 09:03 Къэбэрдей-Балъкъэрым щыщ Прохладнэ щIыналъэм и Приближнэ къуажэм зи узыншагъэкIэ сэкъат зиIэ сабийхэр щрагъаджэу дэт школ-интернат №2-м и гъэсэн цIыкIухэр къыщыхэжаныкIащ Сочи къалэм и «Сириус» фед |
|
11.05.2024 - 09:03 ТекIуэныгъэм и махуэ къэблэгъам пежьэри, Кэнжэ къуажэм иджыблагъэ дзюдомкIэ зэхьэзэхуэ щрагъэкIуэкIащ. Абы щызэпеуащ 2011 гъэм къалъхуа ныбжьыщIэхэр - псори зэхэту 113-рэ. |
|
10.05.2024 - 12:25 ЦIыхум и лъэр нихьэсащ хы лъабжьэми, къуршу щыIэм я нэхъ лъагэми, хьэршми. Ари хъунт и Iэужь къыщимынэу, щIыуэпсым хэмыIэбэу, пщIэ хуищIу щытатэмэ. |
|