Тюнене «Единая Россия» партияны КъМР-де регион бёлюмюнде Юйретиучюню бла Устазны кюнлерине жораланнган жыйылыу ётгенди. Аны КъМР-ни Парламенти партиячыла бла бирге къурагъандыла.
Къууанчлы жыйылыугъа республиканы районларындан бла шахарларындан билим бериу системада жетишимли уруннган 33 специалист чакъырылгъанды. Аланы алгъышларгъа уа РФ-ни Къырал Думасыны депутаты Ирина Марьяш, КъМР-ни Парламентини  Председатели Татьяна Егорова, аны орунбасары, «Единая Россия» партияны регион бёлюмюню секретары Михаил Афашагов эм партияны регион бёлюмюню исполкомуну таматасы Дмитрий Парафилов келгендиле.
Кесини алгъыш сёзюнде Татьяна Егорова юйретиучюлени бла устазланы сыйлары не заманда да бийик болгъанларын чертгенди.
- Бюгюнлюкде сизден  сурам алгъындан эсе уллуду. Жашауну шёндюгю излемлерине келише билиу бек магъаналыды. Сиз а ол жумуш айыпсыз тамамланнганына аламат юлгюсюз. Мен а кесими, партияны да атындан сизге саулукъ, тёзюмлюк эм насып тежейме. Окъуучуларыгъызны жетишимлери дайым да къууандыргъанлай турсунла, - дегенди Татьяна Борисовна.  
Ызы бла  ол  устазланы бла юйретиучюлени саугъалау жумушну бардыргъанды.  Белгиленнгенлени араларында Элбрус посёлканы орта школуну школгъа дери билим берген бёлюмюню таматасы Мадина Резаева да бар эди.
Жыйылгъанланы кёллерин кётюрюп, жыр саугъа этерге уа ары белгили жырчы эм педагог Таукенланы Галинаны сохталары келгендиле. Искусстволаны колледжини фахмулу студентлери халкъ бек сюйген чыгъармала бла жюреклени къууандыргъандыла.  
Андан сора сёз Ирина Марьяшха берилгенди. Къырал Думаны депутаты  биринчи сабий сад узакъ 1836 жылда Петербургда ачылгъанын эсге салып,  бу жыйылыугъа энчи ыразылыкъ бла къатышханын айтханды.   «Сиз саласыз бизни хар бирибизни да мурдорубузну. Сизни къолларыгъыздан ётедиле сабийлерибиз. Ол себепден сиз берген билим, къылыкъ аланы тамблагъы кюнлерини кюзгюсюдю», - дегенди Ирина Евгеньевна.
Михаил Афашагов бла Дмитрий Парафилов да айтылгъан алыгъышлагъа къошулуп, келе тургъан эм озгъан байрамлары бла устазланы, юйретиучюлени да алгъышлагъандыла. Жыйылыуну ахырында ары чакъырылгъанла, власть органланы келечилери да суратха тюшгендиле.