Озгъан шабат кюн Нальчикде къан алыучу станцияда ишлегенле шахарда  Къабарты-Малкъар Россейге къошулгъанлы 400-жыллыгъы атлы майданда,  энчи машиналары бла тохтап, къан берирге ыразы болгъанладан  аны алгъандыла. Майданнга машина келгинчи окъуна да, аны сакълап кёп адам сюеле эди. «Инсанларыбыз, быллай ишни боллугъун эшитгенлей, олсагъат  жетип къаладыла», - дейди  врач Хубийланы Мадина.
Ол келгенле къанларын хакъсыз бергенлерин энчи чертип айтханды. Ахча тёлемегенликге, къан берген хар адамны машинаны ичинде окъуна  жылы аш-суу бла сыйлай эдиле.
«Быллай жумушладан сора къан кереклибиз 100 процентге толады, къыралда аллай кёрюмдю бла  махтанырыкъла алай кёп тюйюлдюле. Бизде сыйлы донорланы саны да иги кесекди. Андан сора да, станцияда ишлегенле бу энчи машина бла республиканы район араларына да барадыла. Аны хайырындан  узакъ элледе жашагъанла, шахаргъа келе турмай,  быллай акциялагъа  къатышыр  онг табадыла», - деп къошханды Хубийланы Мадина.       
Врач чертгеннге кёре, станция КъМР-ни багъыу учрежденияларына кюн сайын да  къанны кереклиси тенгли бир тапдырады.

Холаланы Марзият.