КъМР-ни Башчысы Казбек Коков  Подмосковьеде Красногорскде террористлени хаталарындан ажымлы ёлгенлени эсгериуге  болжаллылы халда этилген мемориалгъа гюлле салгъанды. Террористле аманлыкъчы ишлерин 22 мартда ингирликде 8 сагъатда болдургъандыла.

Бир къауум киши аскер кийимлеге ушагъан быстырланы кийип, «Крокус Сити Холл» деген комплексде автоматла бла адамланы юслерине от ачхандыла. Ахыр билдириулеге кёре 115 адам ёлгенди, 117 адам жаралы болгъанды. Нальчикде бушуулу митинге шахарчыла, республикада тургъан къонакъла, власть органланы, жаш тёлю эм жамауат биригиулени келечилери да келедиле. Адамла мемориалгъа гюлле келтирип саладыла. «Тюнене мамыр адамлагъа, сабийлеге, тиширыуулагъа къажау болмагъанча террор иш этилгенди. Аллай ишни сансыз этип къояргъа жарамайды. Террорчулукъну ахырысы бла да къурутургъа керекди»,-дегенди КъМР-де волонтерлукъ къымылдауну оноучусу Салима Балаева.

«Крокус Сити Холл» концерт залда этилген террорчулукъ -ол адамланы аслам халда магъанасыз ёлтюрюудю», -деп белгилегенди «КъМР-де Хорламны  волонтерлары»,- битеуроссей биригиуню регион таматасы Георгий Аристов.

«Тюнене адам айтып айтмазча аллай бушуу иш болгъанды, ол бизни барыбызны да титиретгенди. Республиканы жаш тёлюсю терроризмге къажауду», -дегенди КъМР-ни Жаш тёлю правительствосуну председатели Байтугъанланы Исмаил.

«Бушууню юсюнден жангылыкълада эштгенимден сора, бек алгъа Москвада жашагъан жууукъларыма бла шуёхларыма сёлешгенме. Сёзле бла айтып ангылатхан къыйынды ол къазауатда ёлгенлени жууукъ адамлары бюгюнлюкде сынагъанларын», -деп жарсыуун билдиргенди Биринчилени къымылдаулары деген битеуроссей биригиуню республикада таматасыны орунбасары Валерия Баваш.

 Къабарты-Малкъарны жаш тёлю биригиулерини келечилери ажымлы ёлгенлени жууукъларына бла ахлуларына къайгъы сёз айтхандыла эмда жаралы болгъанлагъа саулукъ тежегендиле.