Нальчикде Идаров атлы орамда биринчи номерли автовокзал бу айны ахырында жабыллыкъды. Бу оноу шахарны ичинде орамла транспортдан эркинирек болурча ол хыйсап бла этилгенди. Ары келиучю маршрут автобусла уа энди «Северный» эм «Южный» вокзаллагъа барлыкъдыла, деп билдиргендиле КъМР-ни Транспорт эмда жол мюлк министерствосундан.

Алай бла, 30 мартда, Зольск, Элбрус районла эмда Прохладна шахар округ (Екатериноградская эмда Псыншоко эллени ичи бла) таба баргъан маршрутла «Северный» автовокзалгъа кёчерикдиле. Май, Терк районлагъа эмда Прохладна шахар округга жюрюген маршруткала уа – «Южныйге».

Биринчи апрельде уа алагъа башха регионлагъа жюрюген маршрут транспорт да къошуллукъду: «Северныйге» - Адыгея, КъЧР, Кърым, ЛНР, Ставрополь эм Краснодар крайла, Ростов, Астрахань, Волгоград, Саратов областьла, Москва эмда Санкт-Петербург таба баргъанла, «Южныйге» уа – Шимал Осетия-Аланиягъа, Ингушетиягъа, Чеченнге эм Дагъыстаннга жюрюгенле.

Эсигизге салайыкъ: «Северный» автовокзал Нальчикден Чегем жанына чыкъгъан жерде орналыпды, «Южный» а - «Дубки» рынокну къатындады.

Улбашланы Мурат хазырлагъанды.