КъМР-ни саулукъ сакълау министри Рустам Калибатов ишчи жолоучулугъуну чеклеринде КъМКъУ-ну медицина колледжини студентлери бла тюбешгенди. Бу жол ишчи къауумгъа багъыу махкемелени таматалары да киргендиле. Ала бла бирге саулукъ сакълау бёлюмню керекли специалистле бла жалчытыу онгла сюзюлгендиле, жаш специалистлени иш бла жалчытыугъа энчи эс бурулгъанды.
Ол кюн Рустам Калибатов, колледжни бёлюмлеринде болуп, дерсле къалай ётгенлерине къарагъанды. Министр бусагъатда медбрат-анестезист, рентгенолаборант, медсестра, фельдшер, регистратор, фельдшер-медсестра эм башха устала жетмегенлерин жарсыулу шартха санагъанды. Ол жаны бла колледж борчун тынгылы толтурлугъуна ышаннганын да билдиргенди.
Тюбешиуню кезиуюнде студентле министрге кёп соруу бергендиле, къайсы усталыкъны сайларыкъларын да айтхандыла, къонакъны оюмун билирге да излегендиле.
Ахырында Рустам Михайлович айырмалы студентлени да белгилегенди. Медколледжни таматасы Светлана Пшибиева уа, тёреде жюрюгенича, министрге студент билетни тутдургъанды.