Жаш тёлюбюз окъууда, ишде да бет жарыкълы бола, бизни кёллендиргенлей, жамауатыбызны тамблагъы кюню ышаннгылы болуруна ийнандыргъанлай келгени къууанырча шартды. Бюгюнлюкде билим бериуде болгъан аслам тюрлениуню себебинден, жашларыбыз бла къызларыбыз къыралыбызны белгили эмда даражалы окъуу юйлеринде билим алыргъа онг табадыла. Ол угъай да, тыш къыраллада окъугъан, бюгюннгю жашау излеген усталыкълагъа тюшюннгенлерибиз да бардыла.
Нальчикде ёсген къызчыкъ Лелюкаланы Самира да бюгюнлюкде Москваны къырал университетини психология факультетини «Клиникалы психология» ызыны специалитетини экинчи курсунда окъуй турады. Алай эсе да, ол онтёртюнчю гимназияда билим алгъан кезиуюнде тарыхны, обществознанияны дерслерин бирсиледен эсе бегирек жаратханды. Аладан олимпиадалагъа, эришиулеге къатышып да тургъанды. Обществознаниядан а битеуроссей предмет олимпиадада экинчи жерге да тийишли болгъан эди.
Быллай жетишимлери, дерслеге сюймеклиги, артда бу предметден бийик балл алгъаны уа устазы Кючюкланы Зайнаф Ахматовнаны билим даражасыны, ол окъуучула бла кесин ариу жюрюте, дерсин да алагъа сюйдюре билгени ючюн болгъанын да айтады.
Андан сора да, Самира миллет тепсеулеге, искусстволаны художестволу мектебине, художестволу гимнастикагъа да жюрюп тургъанды. Ариу жырлайды, сурат ишлерге да сюеди. Аны бла да чекленмей, сурат алыу бла да кюрешеди. Аланы уа бюгюнлюкде Инстаграмында да салады, жамауат жаратханын да жашырмайды.
Лелюкаланы къызчыкълары, андан тышында да, тыш къыраллы тиллеге тюшюнеди. Ингилизча, къытайча, корейча, чехлилеча да юйренеди. Гимназияда окъугъан кезиуюнде уа бегирек чех тил бла кюрешгенди. Анга терен тюшюнюр мурат бла репетиторгъа да жюрюгенди. Нек дегенде аны Чехияда окъур, бу къыралны тарыхындан, маданиятындан бютюн хапарлы болур умуту бар эди.
Ол тийишли сынауну жетишимли берип, муратына жетип, Карлов университетни мурдорунда чех тилни жашырынлыкъларына, мардаларына, жорукъларына да юйретген школгъа окъургъа да киргенди. Алай а, къыралыбызда болумну тюрленнгенини жарсыуу бла ала виза берирге унамай къойгъандыла.
Бюгюнлюкде уа, белгиленибизча, Самира МГУ-да окъуй турады. Биз а анга психологиягъа уа къалай бла келгенини юсюнден да соргъанбыз. Къызчыкъ окъуучу болгъан кезиуюнде башха-башха сериаллада анга аланы жигитлерини жашауларыны эм сейир, сагъыш этдирген неда биреуден бир болушлукъ излеген чакъларындан юзюклени бирге жыйышдырып, видеороликле жарашдырып, аланы ютубда салып башлагъан эди. Жамауатны ол затха сейири болгъанын а аз-аздан эслегенди.
Бир жол а аны аллай видеоларындан бирине беш миллион адам къарагъанды. Анда аланы хар къайсысы да кеслерини оюмларын, кёз къарамларын, аны бла да къалмай, ёз жашауларындан жарсыуланы да жазгъандыла. Къызчыкъгъа уа аланы окъугъан, адамлагъа аланы жапсарырча жууапла жазгъан да сейир болуп къалгъан эди. Алай бла ол тыш къыралгъа кетер онг чыкъмагъанына артыкъ жарсымай, университетге психология жаны бла окъургъа кирип, бюгюнлюкде анда жетишимли студентлени санындады.
Окъууун бошаса да, усталыгъына кёре ишлеп, жамауатха болушур, алагъа не жаны бла да себеплик этер муратдады. Алай эсе да, жаланда аны бла чекленип къалмай, дизайнерге тюшюнюрге да сюеди. Ол умуту уа юй тизгинли, таза болгъанындан сора да, анда хар не да кесини жеринде болуп, кёзге хычыуун кёрюнсе жаратханы бла байламлыды. Бу усталыкъ бла ишлеген окъуна этмесе да, жашауда тиширыугъа аллай билимини барлыгъы жаланда себеплик этеригин чертеди.
Дерслеринден тышында уа, ол къыралыбызны ара шахарыны даражалы окъуу юйюнде малкъарлы эмда къарачайлы жаш тёлю къурагъан «Землячество» бардыргъан тюбешиулеге къатышады. Аны жыйылыуларына, оюнларына кесибизни тилибизде тестле да къурайды. Мында бардырылгъан иш бла бирсилени да шагъырейлендире, биригиуню Инстаграмын да бардырады. Клиникалы психология жаны бла литератураны бегирек окъуйду. Усталыкъ даражасы, хунери ышаннгылы болурларына къайгъырады.
Аны дагъыда жандауурлукъ сезимин белгилерге тийишлиди. Гимназияда болгъан кезиуюнде окъуна класс башчысындан, окъуу юйню администрациясындан да эркинлик алып, илляула, башха татлы ашарыкъладан къуралгъан саугъала да жыйышдырып, аланы Нальчикде Сабий юйге тенгчиклери бла бирге элтип тургъанды.
Студент кезиуюнде адам кесине антлы шуёхланы табаргъа, ала бла саулай жашауунда да, ол сезимин тас этмей, байламлыкъ жюрютюрге боллугъун кёпле чертиучюдюле. Самира да окъуугъа киргенли аварлы къыз Асият Хайруллаева бла шуёхлукъ жюрютеди. Эндиге дери Къара тенгизни кёре тургъанлыкъгъа, Дагъыстанда къонакъда болгъанында кёргени тенгизни бир башха сезимге ушамагъанын да айтады. Авар халкъны миллет ашарыкълары, адет-тёрелери, аланы саулай да жашау турмушлары да таулу къызгъа бютюнда сейир болгъандыла.
Айхай да, бегирег а ол туугъан жерине, ата-анасына, эгеч-къарындашына тансыкъ болады. Окъууундан бош заман тапса, Нальчикге келирге ашыгъады.
Мокъаланы Зухура
