Бизнес бла кюрешгенлеге таплыкъгъа деп, къыралда бола баргъан, кеслери да аланы ишлери бла байламлы болгъан законлада тюрлениулеге ала женгил хазырланырча, излемле биринчи мартда неда биринчи сентябрьде кюч алыучудула. Алай дагъыда ала официальный халда басмаланнганларындан сора эм азындан 90 кюн озаргъа керекди. ол жорукъ «РФ-де борчлу халда излемлени юсюнден» законда тохташдырылады.

Бу айны биринчисинден башлап, предпринимательлеге къаллай законла эмда жорукъла кюч алгъанларыны юсюнден МСП Корпорация билдиргенди, дегендиле КъМР-ни Экономиканы айнытыу министерствосунда.

- Ауур жюкле ташыучу автомашиналаны жоллада барыу эмда ауурлукъ бла ёлчем контрольну ётюу жаны бла жангы жорукъла тохташдырылгъандыла.

- Зоология тюкенле эмда къанатлыланы сатыу бла кюрешген рынокла жаныуарланы кечиндириу жаны бла излемлеге сакъ болургъа керекдиле энди. Аланы сансыз этгенлеге КоАП-ны 8.52-чи статьясыны биринчи кесегине тийишлиликде тазир салынырыкъды.

- От тюшюуге къажау жорукъла: хостеллени, сабий садиклени, абаданла кечиннген юйлени эмда башха социал объектлени электрокюч ызла къабыннгандан къоруулагъан устройствола бла жалчытыргъа тюшерикди.

- Турагентле бла туроператорла энди Ростуризмни угъай, Экономиканы айнытыу министерствону актларына тийишлиликде ишлерикдиле.

- Багъалы темирледен (кюмюшден къалгъан башхаларындан) этилген затланы юслерине штрих-код салмай сатаргъа жарарыкъ тюйюлдю.

- Тёгерекдеги къудуретни сакълау бёлюмде жангы тазирле кийириледиле. Ала кир-кипчикни, 1 эм 2 класс къоркъуулу болгъан къалгъан-къулгъанланы эмда къоркъуулу производстволу объектлени эсеплеу бла байламлыдыла.

- Чагъыр шешаны юсюнде жюзюмню сортуну эмда аны ким ёсдюргенини юсюнден уллу харфла бла жазаргъа керекди. Тюкенледе анга тийишли эс бурургъа борчлудула. Излем кюч алгъынчы дери алгъан товарларын а сатып бошаргъа эркинлик бериледи.

- Тютюнню эмда никотини болгъан продукцияны чыгъарыргъа эркинлик алырча, аланы ёлчемлерин эсеплерге лицензия болургъа керекди.

- Жюзден артыкъ ишчилери болгъан предприятияланы атларындан ышаныулукъ къагъытны налог органнга жаланда электрон халда берирге жарарыкъды. Алгъын жарашдырылгъан быллай документлени уа болжаллары чыкъгъынчы жюрютюрге боллукъду.

Улбашланы Мурат хазырлагъанды.