КъБР-м узыншагъэр хъумэнымкIэ и министр Къалэбатэ Рустам цIыхухэм япэ дэIэпыкъуныгъэхэр щрат медицинэ IуэхущIапIэхэм унэтIыныгъэм и жыпхъэщIэхэр зэрыщагъэзащIэр къыщипщытэу лэжьыгъэ IуэхукIэ щIыналъэхэм макIуэ. Мы махуэхэм ар щыIащ Шэрэдж район сымаджэщым и поликлиникэ къудамэм.

         ЩIыналъэм и сымаджэщ нэхъыщхьэм и поликлиникэ къудамэм министрым зыщигъэгъуэзащ абы къекIуалIэ цIыхухэм дэIэпыкъуныгъэхэр зэрыхуащIэм, диспансеризацэр зэрырагъэкIуэкIым, гупу зэтримыхьэн щхьэкIэ чэзур зэрызэщхьэщагъэкI Iэмалхэр къызэрагъэсэбэпым. Абы зригъэлъэгъуащ дохутырхэр щылажьэ, цIыхухэм медицинэ Iуэхутхьэбзэхэр щыхуащIэ пэшхэр, «Узыншагъэр хъумэн» лъэпкъ проектымкIэ къащэхуа иджырей IэмэпсымэхэмкIэ къызэгъэпэща лабораториер. Апхуэдэу Къалэбатэм къипщытащ район сымаджэщым и хирургие къудамэм и лэжьыгъэри, клиникэ щытыкIэ хьэлъэхэр зыхуэдэр зригъэщIащ, абы щIэлъхэми епсэлъащ.

         Шэрэдж районым и къуажэхэм медицинэ дэIэпыкъуныгъэхэр къызэрыщызэгъэпэщари зригъэлъэгъуащ министрым. Ар щыIащ Бабугент, Къарэсу, Безенги жылэхэм дэт амбулаториехэмрэ ФАП-хэмрэ. Абыхэм я Iуэхухэр зытетым зыщигъэгъуэза нэужь, пщэрылъ ящищIащ бжыгъэрылъанэ Iэмалхэр къагъэсэбэпу дохутырым и деж зэрызебгъэтх щIыкIэмкIэ лэжьыгъэр нэхъ тэмэму зэтраублэну.

         Къалэбатэ Рустам Шэрэдж щIыналъэм и медицинэ IуэхущIапIэхэм щилъэгъуахэм япкъ иткIэ, IэнатIэм адэкIи зегъэужьынымкIэ, ар егъэфIэкIуэнымкIэ район сымаджэщым и дохутыр нэхъыщхьэм чэнджэщ зыбжанэ иритащ.

ЩХЬЭЩЭМЫЩI Изэ.