Кёп болмай тиширыу клубну бла Нальчикни 1-чи номерли школ-интернатыны келечилери бирге билим бериу учрежденияны арбазында терекле бла юлкюле орнатхандыла.
– Бу жол биз болмагъанча аламат омакъ чакъгъан жыйырма терекчик салгъанбыз. Окъуучула беш кюнню школда турадыла, жаланда шабат кюн юйлерине барадыла. Бу жол ала солуу кюнлерин къызгъанмай, бизге къошулгъандыла. Ишибизни бошагъаныбыздан сора барыбызны да татлы ашарыкъла эмда хычинле бла сыйлагъандыла. Ызы бла уа той-оюн бардыргъанбыз, уллу, гитче да зауукълукъ тапханбыз, – дегенди акциягъа къатышханладан бири Надежда Берберашвили.
«Женский круг» клуб жаз башында терекчикле орнатып кюрешгенли быйыл ючюнчю жыл болады. Буруннгу жыл бла былтыр ала «Дубки» бла «Горный» микрорайонлада орнатхандыла.
Надежда Борисовна айтханнга кёре, быйыл Марина Сергееваны башламчылыгъы бла школ-интернатны тийресин айбатландырыргъа оноу этгендиле.
Клубну буруннгу жылдан бери сайты ишлейди. Анда асламысында ишлеген тиширыула бир бирлери бла ушакъ бардырадыла, жашау болумларын эм башха сорууланы сюзедиле, бир бирлерине болушлукъ тапдырадыла. Акцияланы юслеринден билдириуле этиледиле. Тиширыуланы арасында, нальчикчиледен сора да, Бахсан, Прохладна эм башха районла бла шахарлада жашагъанла бардыла.
Быллай ишле шахарны жашиллендирирге ахшы къошумчулукъ этедиле. Аны бла бирге анга къатышханлагъа да къууанч келтиредиле.