КъБР-м и Iэтащхьэ КIуэкIуэ Казбек лэжьыгъэ IуэхукIэ яхуэзащ къэралым и политикэ партхэм КъБР-м и Парламентым щаIэ фракцэхэм я пашэхэм. ЗэIущIэм хэтащ щIыналъэ политикэ къудамэхэм хабзэубзыху IэнатIэм щаIэ гупхэм я унафэщIхэу АфэщIагъуэ Михаил («Урысей зэкъуэт»), Безгодькэ Владимир (Урысейм и Либерал-демократ парт), Кебеков Владимир («За­хуагъэ здэщыIэ Урысей - Хэкупсэхэр - Пэжым и телъхьэхэр»), Пащты Борис (УФ-м и Коммунист парт), Щхьэгъэпсо Сэфарбий («ЩхъуантIэхэр»).

Республикэм и Iэтащхьэм къыхигъэщащ зэхуэсыр КъБР-м и Парламентым Зэрызыхуигъазэм ипэ къызэрихуэр, абы къыхэкIыуи зытепсэлъыхьынухэр парт унафэщIхэм я пашэхэм цIыхухэм нэхъыбэу зэрызыхуагъазэ Iуэхугъуэхэр арауэ зэрыщытри жиIащ. НэхъапэIуэкIэ КIуэкIуэ Казбек яхуэзащ республикэм и щIыналъэхэм, къалэхэм щыпсэухэм, щIыпIэ администрацэхэм я Iэтащхьэхэм, IэщIагъэлIхэм. 
ЗэIущIэм щытепсэлъыхьащ жылагъуэм мыхьэнэшхуэ щызиIэ Iуэхугъуэхэм. Ап­хуэдэхэт зи хэхъуэр мащIэ унагъуэхэм социальнэу ядэIэпыкъуным, худэчых зиIэ цIыху щхьэхуэхэр хущхъуэкIэ къызэгъэпэщыным, бюджет IэнатIэм Iут лэжьакIуэхэм я улахуэм хэгъэхъуэным, узыншагъэр хъумэнымрэ егъэджэныгъэмрэ, щIыуэпсымрэ псыкIэ къызэгъэпэ­щы­нымрэ епхахэр. 
Депутатхэм жаIащ цIыхубэм хуаIэ пыщIэныгъэхэр нэхъри гъэбыдэн зэры­хуейр. Гулъытэ хэха хуащIащ республикэм хыхьэ жылэхэм я архитектурэм, ахэр зэIузэпэщу щытыным епха Iуэхугъуэхэм. Апхуэдэу тепсэлъыхьащ щIыналъэм хьэблэщIэхэр зэрыщаухуэм, промыш­леннэ, мэкъумэш IуэхущIапIэхэм зэрызыщаужьым, турист IэнатIэр зэрефIакIуэм. Гулъытэ хэха хуащIащ СВО-м хэт зауэлIхэм я унагъуэхэм ягъуэтыпхъэ дэIэпыкъуныгъэхэм, къуажэ пхыдзахэм спорт IуэхущIапIэхэр зэрыщаухуэм, щIалэ­гъуалэ Iуэхум. Парламентархэм зэрыжаIамкIэ, УФ-м и Президент Путин Владимир иригъэкIуэкI политикэм, къы­хилъхьа лъэпкъ проектхэм я фIыгъэкIэ щIыналъэм щызэфIэха мэхъу Iуэху щхьэпэ куэд. 
 КIуэкIуэ Казбек Парламентым и фракцэхэм я унафэщIхэм фIыщIэ яхуищIащ ирагъэкIуэкI лэжьыгъэфIхэм, псалъэ­макъ щхьэпэм зэрыхэтам папщIэ. Апхуэдэуи къыхигъэщащ зытепсэлъыхьа Iуэху­гъуэхэм ящыщ куэдым Зэрызыхуи­гъазэм гулъытэ зэрыщигъуэтынур.