Россейни Эл мюлк министерствосу бла Къабарты-Малкъарны Правительствосу этген келишимге кёре, быйыл республиканы агропромышленный комплексине (АПК) болушлукъгъа 3,3 миллиард сом бёлюнюрюкдю. Аны 2,750 миллиард сому битимчилик, малчылыкъ, сугъарыу, аш-суу, жарашдырыучу промышленность бёлюмлеге, гитче мюлклеге эм эл мюлк кооперациялагъа  берилликди.  Дагъыда 628,8 миллион сом эл жерлени комплекс халда айнытыугъа къоратыллыкъды. 
– Сагъынылгъан ахчадан сор да, жылны ичинде бюджетден къошакъ халда болушлукъ этиуню юсюнден келишимле бегитилгендиле, – деп билдиргенди КъМР-ни эл мюлк министри  Хасан Сижажев.
Эсге сала айтсакъ, былтыр Къабарты-Малкъарда  агропромышленный комплексни айнытыргъа 1101 инсаннга  бюджетден 3 миллиард сом бёлюннгенди. Андан 2,4 миллиард битимчилик, малчылыкъ, сугъарыу, аш-суу, жарашдырыучу промышленность бёлюмлеге, гитче мюлклеге эм эл мюлк кооперациялагъа  жетгенди.