Хауа жылыгъа айланып, кюнню халы да тохташыракъ болгъаны бла, элчиле кёпжыллыкъ жемиш эмда наныкъ юлкюлени орнатыу бла кюрешип тебирегендиле. Бу кюнлеге аны 150 гектарда тамам этгендиле, деп билдиргендиле республиканы Эл мюлк министерствосундан.

Быйыл дагъыда эм азындан бир минг гектарда терек бахчала къурарыкъдыла. Сагъынылгъан юлкюлени юсюнден айтханда уа, былтыр ала ёсген жерлени саны 1500 гектаргъа кёбейген эди.

Аслам кёгет ёсдюрюледи

Ал тергеулеге кёре,  былтыр Къабарты-Малкъарда теплицалада 24 мингден аслам тонна кёгет ёсдюрюлгенди. Тенглешдирип айтханда, буруннгу жылны кёрюмдюсюнден 1,3 процентге кёбюрек болгъанды ол. Асламысы бардыражанладыла, бираз кесеги уа – нашала. Теплицалада дагъыда ариу ийисли хансла да битедиле. Быллай кёгетчилик бла асламысында адамла кеслери кюрешедиле: аланы 60 проценти иели мюлкледеди.

Техника къоллу болгъандыла

Быйыл ал эки айны ичинде Къабарты-Малкъарда аграр бёлюмде уруннганла сатып алгъан жангы эл мюлк техниканы саны жыйырмагъа жетгенди. Ол санда онючюсю тракторладыла, бири мирзеу жыйыучу комбайнды, къалгъанлары уа тюрлю-тюрлю жумушлагъа жараулу затладыла. Аладан тогъузун элчиле лизинг халда алгъандыла.

Урлукъ себиу

 Жерчиликде уруннганла картофну танг жетген сортларыны эмда жашил къудоруну урлукъларын салып башлагъандыла. Биринчисине 900 гектар бёлюннгенди, экинчисин а 1700 гектарда ёсдюрюрге умут этедиле.

Эл мюлк министерствода айтханларына кёре, элчиле хайырланнган урлукъ кесибизде чыгъарылгъанды. Ала иги сортларындандыла, бай тирлик бергенлери бла сыналгъан аллай тюрлюлериндендиле. Сабанлада техника да жетишеди, былтыр аладан отуз жангысын сатып алгъандыла.

Улбашланы Мурат хазырлагъанды.