Мартда Россейни грек-рим тутушуудан биринчиликлери бардырыллыкъдыла: Самарада – 18 жыллары толмагъанланы араларында, Новосибирск областьны Бердск шахарында – 21 жыллары толмагъан юниорланы араларында. Алагъа Элбрус районну Байзуллаланы Юсюпню атын жюрютген олимпиада резервли спорт школуну ары дери эришиуледе алчы жерлеге чыкъгъан келечилери да къатышырыкъдыла. 

Алай бла Ёзденланы Заурбек къырал даражалы эришиуде тутушургъа эркинликни Калининградда Шимал-Кюнбатыш округну биринчилигинде хорлап къоруулагъанды. Ол 60 килограммгъа дери ауурлукъда битеу къаршчы спортчуладан кючлю болгъанды. Джаппуланы Ислам а кесибизни округда  48 килограммгъа дери ауурлукъда доммакъ  майдалны къытханды. Ала экиси да энди Самарада биринчиликге хазырлана турадыла.

Бердскге уа Баппыналаны Къурман (60кг.) бла Чеченланы Амаль (72кг.) атланырыкъдыла, ала Москваны биринчилигинде саугъа жерлеге чыкъгъандыла.

Гёжефлени Россейни сыйлы тренери Локияланы Юрий, тренерле Хапаланы Аслан, Башийланы Махмуд, Балаланы Алим, Ачабайланы Музафар юйретедиле.

Кульчаланы Зульфия.