«Келир заманны коду» федерал программаны жашауда бардырыугъа жораланып КъМР-ни Жарыкъландырыу эмда илму министерствосунда тюбешиу ётгенди. Анга КъМР-ни цифралы айныу жаны бла министри Ислам Ашхотов, билим бериу управленияланы башчылары, мектеплени директорлары, информатикадан устазла да къатышхандыла.
Жыйылыуну башлай, КъМР-ни жарыкъландырыу эмда илму министри Анзор Езаов бу проект 8-11-чи класслада окъугъан фахмулу сабийлеге экижыллыкъ курслада къошакъ билим алыргъа онг бергенин эсгертгенди. «Курсланы биринчи кезиую бошалгъанды, алада окъуучуланы кёрюмдюлери бизни бек къууандыргъандыла», – дегенди.
Тюбешиуню кезиуюнде белгиленнгенича, аллай курсла республиканы 37 школунда бардырылгъандыла. Бахсан район бла Нальчик шахар ол жаны бла алчылыкъны тутадыла. Башха мектепле да бу ишни къолгъа тири алсала кереклиси да чертилгенди.
Проект ючюн «Университет НТИ 2035» федерал оператор жууаплыды. Анга Анна Сенчихина башчылыкъ этеди. Ол экинчи модуль проект хазырлау иш бара тургъанын билдиргенди.
Школлада бу проект бла байламлы иш къалай къуралгъаныны, анга чырмау этген сылтауланы, окъууучуланы жетишимлерини юслеринден 16-чы номерли мектепде информатикадан устаз Ботталаны Светлана билдирген эди. Ол мектепни 9-чу классыны окъуучусу Улбашланы Сафият курсну биринчи кезиуюню юсюнден айтханды. «Цифралы программированияны билирге бек итинеме. Алай Хасанияда жашагъаным себепли Нальчикге барып, юйренир амалым жокъ эди. Насыпха, аллай онг кесибизни мектебибизде къуралгъанды. Манга, тенглериме да бек аламат ишди ол. Жарсыугъа, 7-чи классланы окъуучуларын алыргъа жарамайды. Бир онг бар эсе, аланы атындан тилеген этеме, эркинлик беригиз, юйренсинле», – дегенди ол.
Анзор Езаов 16-чы номерли мектепде проектни жашауда бардырыу тынгылы къуралгъанын белгилегенди. Анда курслагъа жюрюген жыйырма сабий да бирча ахшы кёрюмдюле болдургъанларын чертип, устазланы ишлерине бийик багъа бергенди, школчуланы хакъ алмай юйретип тургъанлары ючюн да ыспас этгенди.
Эсге салайыкъ: «Код будущего» федерал проектни жашауда бардырыу бизни республикада озгъан жылны октябрдебашланнганды. Къошакъ билим бериу жаны бла экижыллыкъ курсла онлайын, офлайн амалла бла да бардырыладыла.
Холаланы Марзият
