Бу кюнледе Элбрус элни библиотекасында Къулийланы Къайсыннга аталып адабият тюбешиу болгъанды. Аны китапхананы  таматасы Сарбашланы Светлана къурагъанды. Ары келгенлеге поэтни жашау, чыгъармачылыкъ жолларыны юслеринден айтханды,  назмуларын да окъугъанды.
Къайсынны поэзиясы  малкъар халкъны жашау дуниясыды. Аны назмуларын окъуй, миллетни жарсыуун, къууанчын да кёребиз. Тилибизни ариулугъу, байлыгъы бла да шагъырей болабыз. Сюймекликге, шуёхлукъгъа жангы кёзден къарайбыз. Къайсын бизни алда баргъан байрагъыбызды. Таулу халкъ сау къадар аны ёмюрлюк сёзлери дайым айтылгъанлай турлукъдула,-дегенди Светлана.
Андан сора Элбрус элни орта школуну окъуучулары да Къайсынны чыгъармаларын кёлден айтхандыла.
Ахырында библиотеканы таматасы Къайсынны китапларындан къуралгъан кёрмючню да кёргюзтгенди. Ол кюн ары келгенле уллу зауукълукъ алып кетгенлери да сёзсюздю.
Османланы Хыйса.