РФ-ни Правительствосу регионлагъа инсанланы газ ызлагъа къошуу жумушлагъа эм анга керекли оборудование сатып алыугъа 2,5 миллиард сом бёлгенди. Бу ахча «Единая Россия» Газпром бла бирге бардыргъан халкъны газ бла жалчытыу жаны бла социал программаны жашауда бардырыргъа себеплик этерикди. Аны юсюнден партияны генсоветини башчысы Андрей Турчак айтханды.

 Инсанланы бу къырал болушлукъгъа тийишли къауумларына, РФ-ни Президентини башламчылыгъы бла, 100 минг сом бериледи. Льготала Уллу Ата журт урушну ветеранларына бла аны сакъатларына, къаугъаланы ветеранларына, аланы юйюрлерине, кёп сабийли эм къолайсыз юйюрлеге бериледиле.

Эсигизге салайыкъ, 2021 жылда РФ-ни Президенти Владимир Путин газ ызны инсанны юйюню къатына дери хакъсыз тартыуну юсюнден законнга къол салгъанды. Бу къырал болушлукъну алыр ючюн Госуслуги порталда тилек жазаргъа керекди, Кёп функциялы араланы, «Газпром межрегионгазны» бёлюмлерини  болушугъу бла хайырланыргъа да боллукъду.   Партия бу мадарны кенгертир жанлыды.  Ол санда газ тартыргъа керекли оборудованиягъа багъаланы бир низамгъа келтирирге кереклисин белгилейди.

Жашау журтланы газгъа къошуугъа регионланы башчылары жууаплыдыла.  Ала «Единая Россияны» оноуу бла регионлада программаны жашауда бардырыуну штабларына таматалыкъ этедиле. Дагъыда социал газификация программагъа  бир ненча фатары болгъан журтла да кирирге боллукъдула.

 Бюгюнлюкде къыралны 72 регионунда льготалары болгъан инсанла газ оборудованияны учуз багъала бла сатып алыргъа боллукъдула неда аланы къоранчларыны бир кесеги артха къайтарылады.  Партия газ оборудование сатып алыугъа 100 минг сом субсидия бериуню юсюнден РФ-ни Президентини буйругъу къалай толтурулгъанын контрольда тутады.

 Къабарты-Малкъар социал газификация жаны бла программа бийик даражада толтурулгъанын айтырчады. Жылны аллында республиканы Башчысы, «Единая Россияны» КъМР-де регион бёлюмюню секретары Казбек Коков «Газпромну» департаментини оноучусу Владимир Марков эм «Газпром межрегионгаз» обществону таматасы Сергей Густов бла газ тартыуну сорууларын сюзгендиле, деп билдириледи KABARDIN-BALKAR.ER.RU сайтда.

 Кенгешде 2021-2025 жыллада тамамланыллыкъ программаны ал эсеплери чыгъарылгъан эдиле. Анда белгили этилгенича, былтыр Терк районда элле аралы газопровод ишленнгенди, къоратылгъан газны тергерик оборудование салыннганды. «Программа республиканы экономикасын, социал сферасын айнытыргъа, газ ызлагъа жангы предприятияланы къошаргъа болушады. Анга Элбрус районда ишлене тургъан комбинат да кирликди. Къабарты-Малкъарда газ ызланы тартыуну 2026 жылда бошаргъа белгиленеди»,-деген эди кенгешде   Сергей Густов.

Анда белгили этилгенича, социал программаны чеклеринде республикада газ ызла  1572 юйге тартылгъандыла. Жыйылыуда льготалары болгъанлагъа, къыйын жашау болумгъа тюшгенлеге болушлукъну къошакъ  мадарларын да сюзген эдиле.

Программаны онглары бла  социал учрежденияла хайырланыргъа да боллукъдула.   Энди медицина эм билим бериу учрежденияла газ ызлагъа хакъсыз къошулургъа боллукъдула. Аны чеклеринде   жылны аллында Дыгулыбгейде поликлиникагъа газ тартылгъанды. Сёзге, программаны болушлугъу бла Бахсан районда 180 юйюр газ ызлагъа хакъсыз къошулгъандыла.   Май районда уа бу онг бла 46 юйюр хайырланнгандыла.

Басмагъа Тикаланы Фатима хазырлагъанды.