Росгвардияны Къабарты-Малкъарда управлениясыны къуллукъчусу майор Марина Лукожева Нальчикни 19-чу номерли орта школуну окъуучулары бла кишиликни дерсин ётдюргенди. Бу тюбешиуню «Эльбрус» энчи отрядны махтаулу тарыхына атагъандыла.  

Школчула отрядны къалай къуралгъанын, анда къуллукъ этген жигитле кеслерини жашауларын аямай, адамлагъа болушханларын билгендиле. Ызы бла уа аны юсюнден видеороликге да къарагъандыла. 

– Тюбешиуню баш борчу – ёсюп келген тёлюге кишиликни, жигитликни, антны, намысны магъаналарын ангылатыу эди. Андан сора да, Ата журт урушда жан берген къызыл аскерчилеге ыспас этиуню бир заманда да унутургъа жарамагъаныны юсюнден да сёлешгенбиз, – дегенди Марина Лукожева.  

Школну башчылары эм сабийле да офицерге сейир хапарлары ючюн ыразылыкъларын билдиргендиле эм быллай тюбешиулени терк-терк бардырырларын тилегендиле.  

Холамханланы Алима.