КIуэкIуэ Казбек лэжьыгъэ IуэхукIэ IущIащ КъБР-м узыншагъэр хъумэнымкIэ и министр Къалэбатэ Рустам. Зэхуэ-асыр теухуат республикэм и медицинэ IуэхущIапIэхэм я лэжьэкIэм.
ЗэIущIэм хэтащ Сымаджэхэм чэнджэщ щрат, я узыр къыщахутэ центрым (МКДЦ) и дохутыр нэхъыщхьэм и къалэныр пIалъэкIэ зыгъэзащIэ Аслъэн Ахьмэд, Республикэ клиникэ сымаджэщым а къулыкъу дыдэр щызезыхьэ Тет Хьэсэнбий, Кардиологие диспансерым и дохутыр нэхъыщхьэм и къалэнхэр пIалъэкIэ зыгъэзащIэ Дохъушокъуэ Герман сымэ.
Республикэм узыншагъэр хъума щыхъун папщIэ мы IуэхущIапIэхэм мыхьэнэшхуэ зэраIэр къыхигъэщащ КIуэкIуэ Казбек. «УнафэщIхэм я пщэ къыдохуэ цIыхухэм я узыншагъэр зыхуей хуэгъэзэныр зэрыщытыпхъэм хуэдэу лъагэу къызэгъэпэщыныр», - жиIащ КъБР-м и Iэтащхьэм. ЗэIущIэм щытепсэлъыхьащ мы IуэхущIапIэхэм дяпэкIэ зэрызаужьы-нум. Республикэм и клиникэ сымаджэщым зи узыншагъэмкIэ гуныкъуэгъуэ зиIэхэр зэкIуалIэ унэщIэ пащIыхьыну, жьыхэр щызэрагъэпэщыжыну я мурадщ. ДэIэпыкъуэгъу псынщIэм къудамэ щхьэхуэ хухахыну, дохутырхэм уахуэзэныр нэхъ тынш ящIыну я гугъэщ. Тет Хьэсэнбий зэрыжиIэмкIэ, зэманым декIу IэмэпсымэщIэхэр яIэмэ, дохутырхэм я дэIэпыкъуныгъэр хуэныкъуэхэм нэхъ псынщIэу яIэрыхьэнущ. КIуэкIуэ Казбек унафэ ищIащ сымаджэхэм я егъэблэгъапIэм епха унафэ пыухыкIахэр и кIэм нагъэсу, икIэщIыпIэкIэ ухуэныгъэм щIадзэну.
Сымаджэхэм чэнджэщ щрат, я узыр къыщахутэ центрым фIагъ лъагэ зиIэ хирургие Iэмалхэм зыщрагъэубгъунущ. Лъыр тэмэму зекIуэным хуэщхьэпэ Iэмэпсымэхэр нэхъыбэ хъумэ, гу-лъынтхуэ узыфэхэм ехьэлIа операцэхэми хэхъуэнущ. Iэмэпсымэр илъэс кIуам къэрал ахъшэкIэ къащэхуакIэщ. Профессор Аслъэн Ахьмэд зэрыжиIэмкIэ, мы къудамэм зрагъэужьынущ, къэралым нэхъ Iэзэу ис IэщIагъэлIхэр зыдагъэIэпыкъуурэ. «Республикэм узыншагъэр хъумэнымкIэ и IэнатIэм ар сыт и лъэныкъуэкIи хуэщхьэпэнущ».
Гулъытэ щхьэхуэ хуащIащ Кардиологие диспансерым. Мыбы зыщызыгъэхъуж сымаджэхэм гум еIэзэнымкIэ IэмалыщIэхэр ирахьэлIэн щIадзакIэщ. Къалэбатэ Рустам зэрыжиIэмкIэ, дохутырхэм къалэн нэхъыщхьэу зыхуагъэувыж мыбы щIэлъу инфаркт, инсульт хуэдэ узыфэхэр зэуэлIахэм щакIэлъыплъы-ныр. Гум еIэзэнымкIэ сымаджэщ нэхъыщхьэм и пщэ делъхьэж республикэм щылажьэ мыпхуэдэ IуэхущIапIэ псоми я лэжьыгъэр зэригъэуIуныр, сымаджэ нэхъыбэм еплъыныр, IэщIагъэлIхэмрэ Iэмэпсымэхэмрэ нэгъэсауэ ягъэлэжьэныр. Дохъушокъуэ Герман къызэхуэсахэм яжриIащ и унафэм щIэт диспансерым и лэжьакIуэхэм я улахуэм ику иту процент 30-кIэ зэрыхагъэхъуар. Пыхусыхум зыщиубгъу зэманым сымаджэхэм щхьэхуэ-щхьэхуэ укIэлъыплъынущ, компьютеркIэ лажьэ томографрэ иджыри зы ангиографрэ ягъэувынущ, эндоскоп зыщIэт къудамэ къызэIуахынущ. Къызэхуэсахэр тепсэлъыхьащ медицинэ Iэмэпсымэ нэхъ инхэр къызэращэхуну щIыкIэм, абы и уасэр къыздрахынум. Министрым къыхигъэщащ республикэм щынэхъыщхьэ мы IуэхущIапIэхэм щхьэж и унэтIыныгъэр КъБР-м зэрыщылажьэм кIэлъыплъын зэрыхуейр.
КIуэкIуэ Казбек унафэ ищIащ Щоджэным и цIэр зезыхьэ уэрамыр щызэрагъэпэщыжкIэ, абы Кардиологие диспансерым и пщIантIэри гъусэ хуащIыну. Республикэм ис сымаджэхэм зыхуэныкъуэ хущхъуэхэр и чэзум зэраIэрыхьэным теплъэкъукI зэрымыхъунури къыхигъэщащ.
КъБР-м и Iэтащхьэмрэ Правительствэмрэ я пресс-IуэхущIапIэ
