Бизни республикада жашау журт-коммунал мюлк предприятияланы электрокюч ючюн этген борчларыны битеулю ёлчеми бир миллиард сомгъа жете къалады. Ол быйыл биринчи ноябрьге тарихледиле. Кесинде да 330 миллион сому 2022 жыл башланнганлы бери къошулгъанды. Борчну 94 проценти таза суу эмда жылыу бла жалчытыучу предприятияланы боюнларындады, деп билдиргендиле «Россети Шимал Кавказ» компанияны Къабарты-Малкъарда бёлюмюнден.

Бирсилени араларында эм кёп берлиги – 372 миллион сом - Нальчикде «Водоканал» муниципал унитар предприятияда барды. Андан 238 миллионун ол быйыл борч этгенди. «Нальчикде жылыу бла жалчытыу компания» МУП а 228 миллион сом тёлерге керекди. Ол да кесини борчун быйыл ал он айны ичинде 123 миллион сомгъа кёбейтгенди.

Энергетикле айтханларына кёре, ол алай болгъаны, сетевой комплексни жумушларын тындырыргъа, ремонт эмда жангыртыу ишлени бардырыргъа чырмау этеди. Аны хатасы уа хайырланыучулагъа да таяныргъа боллукъду.

Омарланы Мурат.